越南BB出世唔只嘩嘩大叫 一隻手搞到醫生企定定

有人話3歲定80，小小年紀可能就睇得出小朋友性格係點。但越南就有BB唔洗等到3歲，一出世就畀人知道自己脾氣有幾大！

一般啱啱出世嘅BB，喺醫生接生後，就會躺喺手術台等，但越南有位BB喺出世後，除咗嘩嘩大叫之外，竟然一手拉住醫生手術服，搞到醫生走唔甩！

醫生憶述指，當時啱啱完成生產手術，正要離開除下手術服，但發現躺喺小床嘅BB用右手拉住自己手術服嘅帶，但醫生知唔可以同BB鬥力，唯有等其他醫護人員幫忙，但因為情景太可愛，BB家人都忍唔住拍照，而醫院都喺社交網站分享咗依張相片。

有唔少網民見到後都留言話，「一出世就咁暴躁？」、「BB可能未準備好嚟到依個世界，但被醫生拉出嚟，所以要揾醫生算帳！」，更有網民指可能係BB太餓，拉住醫生想飲奶！如果真係咁皮，睇嚟依位BB嘅爸爸媽媽要花多啲心機去教喇～

Text：Mami Editorial

Photos：Bệnh Viện Quốc Tế Phương Châu