老人家一句玩笑容易造成孩子心靈受創 5句唔應該對小孩講嘅說話

By rachel.lo on 05 Mar 2019

現今社會上，好多父母都需要外出工作，有時難免需要請家人幫忙湊小朋友，不過喺教養上，好多時家人未必同父母企喺同一陣線，尤其是會特別縱孫子嘅老人家，或擅長靠威嚇去令小朋友乖乖聽話嘅家人，無論請邊位幫忙湊小朋友都好，應彼此提醒避免喺小朋友面前講以下5句說話。

1. 爸爸／媽媽唔要你呀！

唔知點解，好多老人家都鍾意對小朋友開呢種玩笑，不過對爸爸媽媽而言，呢句說話一啲都唔好笑，對小朋友更會造成傷害。因為小朋友根本唔識分說話嘅真假，所以好容易會信以為真，錯誤理解成爸媽出門返工就係唔要自己，會失去對父母嘅信任同安全感。加上小朋友好清楚分離嘅痛苦，所以呢個咁冇營養嘅玩笑，絕對唔應該亂講。

想幫忙嘅老人家應該同孩子講清楚，爸爸媽媽返工只係有重要事要忙而暫時離開屋企，夜晚就會返黎，而家孩子可以開心跟公公婆婆／爺爺奶奶玩一陣先。

2. 你再曳就會畀警察叔叔拉你！

當小朋友曳曳，大人想小朋友立即變乖時，總會嚇嚇小朋友：「你再係咁！警察叔叔就會將壞小孩捉走喇！」希望可以嚇怕孩子，令佢哋唔敢再做同樣嘅事。但係呢句說話就會默默將警察喺孩子心目中嘅形象扭曲，令孩子內心對警察產生恐懼，認為自己係壞小孩會被警察捉走，所以當遇到危急情況時，亦唔敢向警察叔叔求助，造成反效果。

3. 小朋友係咁㗎啦！

好多父母、長輩都會偏愛自己嘅孩子，有時明知道孩子嘅行為係唔啱或騷擾到其他人，但當被其他人出口話孩子唔啱嘅時候，父母總係護子心切，反駁一句：「小朋友係咁㗎啦！」其實好明白爸爸媽媽唔希望孩子受委屈，即使要教都唔想係旁人出聲教。但事實上，偶爾出自旁人口中嘅「訓話」，小朋友會記得更深刻而下次唔敢再犯，不過當父母講出呢句說話，反而會令小朋友覺得自己理應係有「特權」，所以大條道理繼續犯錯。

4. 都係佢唔好，我哋打打佢！

每當小朋友被物件絆倒而大喊不止，大家有冇試過抱住起小朋友，同小朋友講：「都係佢唔好！整到小寶寶喇！我哋一齊打打佢！」原本痛哭嘅小朋友馬上破涕為笑，大家亦會因為孩子嘅笑臉而鬆一口氣。不過呢句說話就會好容易養成孩子日後唔識得反省令自己受傷嘅真正原因，而變得愛推卸責任。所以，當孩子以後再次被物件絆倒而受傷時，爸爸媽媽應叫小朋友行路要睇清楚環境，唔單止可以教會孩子避免同類嘅事情，亦唔怕孩子變得愛推卸。

5. 唔好同媽媽講！

小朋友嘅大小事，媽媽都會管得非常嚴格，例如唔俾小朋友食無益嘅零食、睇太多電視等。但寵愛孫子嘅老人家總會想氹小朋友，令孫子鍾意自己多啲，而偷偷塞零食俾小朋友，最後同小朋友講：「唔好話畀媽媽聽！」當作係孫子同自己之間嘅「秘密」。不過呢種做法，就等於同小朋友講，媽媽係壞人，而爺爺奶奶係好人。唔單止會教識小朋友講大話，更會一手破壞媽媽為孩子著想嘅管教。