爸爸比媽媽做得更出色 媽媽不能代替爸爸為孩子做4件事

一講到照顧孩子嘅生活、教養孩子、關心孩子、但凡同孩子有關嘅一切，第一時間諗到嘅角色都係媽媽。其實，育兒係父母雙方都需要共同參與嘅事，媽媽再了解孩子、願意比爸爸投入更多時間喺孩子身上都好，喺孩子心目中，有啲事情係媽媽無法取代爸爸去做； 亦有啲事情，爸爸比媽媽往往做得更好。爸爸喺家庭嘅責任，從來唔係只有賺錢咁簡單，當中包括支撐太太同成就孩子。

1. 同孩子玩遊戲

曾經有研究指出，爸爸多啲同孩子可以令孩子更聰明。事實上，男性比女性本來喺思想同體力上有著極大不同。喺同孩子玩嘅層面上，爸爸願意放得更開，思維上更跳脫，可以令孩子有更大膽嘅想法，更勇敢去靠近新事物，加上男性體力較大，可以同孩子玩一啲需要肢體活動較大嘅遊戲，如騎膊馬、舉高高等，所以孩子都會玩得更盡興！對比起媽媽總會擔心孩子會受傷、整爛物品，而不自覺限制孩子嘅行動，爸爸喺呢方面往往比媽媽做得更好。

2. 理性講道理

男性同女性喺同一件上嘅出發點，往往係女性偏向感性，男性偏向理性。當孩子出現搶玩具等紛爭時，媽媽慣常會由情感出發：「弟弟唔開心喇，你讓畀弟弟玩好唔好？」而孩子通常都唔受媽媽呢一套，覺得自己夠唔開心，咁邊個讓畀自己？而爸爸通常會更擅長講道理，令孩子心服口服去聽從爸爸嘅指使去做，如： 「而家你讓畀弟弟玩一陣，之後等弟弟沖涼，你有排玩啦！」

3. 成為孩子嘅英雄

作為媽媽，即使已為孩子訓練到自己咩都做得黎，但始終亦只係一個柔弱嘅女子，有時面對昆蟲都係會驚、小朋友玩具壞咗唔識修理、小朋友病咗會手足無措、遇到橫蠻嘅途人威嚇會退縮⋯⋯而爸爸適時行出黎為妻兒成功解決問題，爸爸嘅勇敢、果斷同威嚴都令孩子感到爸爸就係最可靠嘅英雄，心裡面會更踏實。

4. 成為將來擇偶對象嘅模範

爸爸平日嘅行為，作為子女都會看在眼裡。如果家中有女兒，爸爸平日對待太太同女兒嘅態度同方式，亦有機會影響女兒將來嘅擇偶標準，希望將來嘅另一半會好似爸爸咁體貼、愛護、遷就媽媽，同時亦會寵愛、照顧、禮讓自己。

或者孩子平時慣常愛黐住媽媽，令爸爸覺得自己冇介入嘅空間，所以好多時都會冇癮咁行開，冷眼睇著媽媽同孩子嘅「恩愛秀」，但其實爸爸喺育兒角色上都起著舉足輕重嘅地位，對孩子嘅成長有好大影響，所以媽媽們亦要給予爸爸同孩子適當嘅親近時間好好相處，令爸爸有機會做返父親嘅責任。

Text：Mami Editorial

Photo Source： Pinterest