愛錫仔女總會有人畀意見 5句會激嬲全職媽媽嘅說話

要放棄本身熟悉嘅工作、升職嘅機會、唔錯嘅薪金⋯⋯專心一意做全職媽媽去湊好自己嘅小朋友，呢個決定對好多媽媽而言，係一個非常大嘅犧牲。感覺上係放棄自己嘅大好前程、過去嘅成就，全為唔好錯過自己孩子只有一次嘅成長時刻。事實上，媽媽比任何人都更清楚自己呢個決定會帶黎咩後果，但就感到非常值得，絕不後悔！然而，身邊總有人會給予「善意提醒」，去質疑全職媽媽嘅生活，以下最常聽到嘅5句令全職媽媽感到唔開心嘅說話。

1.唔做嘢好易脫節㗎！

好多旁人眼中，全職媽媽就只係「師奶」一名，對社會上大小議題都毫不認識，只識得湊仔，冇做嘢幾年就好似失去晒工作技能一樣。事實上，而家網絡發達，亦為全職媽媽們帶黎無限最新資訊同機會，閒時可以做吓KOL、帶小朋友出席各種活動、聽吓育兒專家心得⋯⋯有時比起坐office見識到更多。

2. 你就好啦！做少奶奶！有老公養！

呢句說話嘅意思就好似話全職媽媽咩都唔駛做，好似每日只係嘆喺梳化、無所事事就一日咁！事實上媽媽一日要處理好育兒、管教、家務，做慢啲都唔得！係就係有老公養，但少咗媽媽原本嘅收入，媽媽要計算每個月嘅家庭開支，喺慳得一蚊得一蚊嘅情況下令家人得到最好嘅生活品質，係一啲都唔容易嘅事！

3. 咁你依家咪冇收入？

有時間咪做啲網購小買賣、趁小朋友返學做下兼職，唔通賺幾多錢又要同你講咩？而且老公足以養起家庭，媽媽有冇個人收入又有咩所謂？

4. 無請工人幫你湊咩？

全職媽媽咪就係嗰個工人！香港居住地方狹窄，唔係個個屋企都會有地方去請一個外人一齊居住，加上養多個人開支更大。如果自己應付得黎，當然希望自己一手一腳照顧小朋友。

5. 你得閒執下個樣啦！

全職媽媽們一日24小時都唔夠用，通常都只花心思去扮靚小朋友而唔係自己，而且化妝品又怕污染到小朋友、靚啲嘅衫又未必可以行動方便，所以先會令媽媽有慣常嘅方便穿搭，不過呢啲唔係做媽媽嘅唔會明㗎喇！有時媽媽唔駛刻意去執個樣，都係老公同孩子心目中最靚得令人舒服～

Text：Mami Editorial

Photo Source： Pinterest