點解BB唔親近自己？決定BB心目中重要嘅人排名TOP 4

By rachel.lo on 28 Feb 2019

爸爸媽媽有冇好奇過，同樣只見過幾次面，BB對某啲人會表現得特別親近，好容易就敞開心扉玩得不亦樂乎；但係對某啲人就表現得非常緊張，總係一副小心翼翼、好怕同對方接觸呢？甚至會令某啲爸爸感到委屈嘅情況係，平時放工返到屋企明明同BB玩得好開心，但一到要瞓覺嘅時候，BB就會好抗拒同爸爸一齊瞓，有時會大喊大叫、點都唔肯入房瞓，但同媽媽兩個瞓就完全冇問題。明明自己都係BB最親近嘅人之一，點解待遇會差咁遠？其實喺BB心目中，並唔係好似父母所諗嘅只有父母先係BB最親近嘅人，BB內心係有自己認為最重要嘅人嘅排序。

1. 真正關心BB嘅人

雖然BB年紀小小，但其實內心非常敏銳，對於邊啲先係真正最關心自己嘅人係非常清楚，如會經常照顧自己，無論發生咩事都會第一時間衝出黎安撫、保護BB，總係溫柔對BB說話、氹BB開心⋯⋯令BB感到滿滿安全感，喺BB心目中，咁樣嘅大人係最可靠、最關心自己身體同內心感受，自然最令BB依靠。

2. 經常會陪BB玩嘅人

所有BB都係精力充沛、好奇又愛玩，最鍾意就係同大人一齊玩遊戲，而唔係自己孤伶伶咁玩，所以如果有一個常常會陪自己玩嘅大人，BB會覺得呢個人係自己最好嘅「朋友」，可以一齊分享樂趣，自然會樂於親近，所以如果爸爸媽媽想同BB多增進感情，平日喺屋企有空閒時間，不妨多多陪BB玩遊戲。每個BB都希望得到心愛嘅大人注意自己，如果爸媽注視手機嘅時間比自己嘅長得多，或BB想搵你玩而你只掛住玩手機而叫BB自己玩，都會喺BB心目中減分哦～

3. 經常鼓勵BB嘅人

有啲爸爸媽媽會覺得，明明自己已經日日抽好多時間陪BB，但BB總係對著自己唔太親近嘅感覺，反而會樂於親近爺爺奶奶。咁父母亦要反思下，自己喺平日對BB嘅態度係點呢？有經常給予BB笑容、多多讚賞BB嘅表現嗎？定係經常性責怪BB唔聽話、唔合作，令BB覺得自己被父母討厭呢？每個BB都好鍾意被讚美同表揚，有冇留意到每當笑著讚BB「叻叻」嘅時候，BB都會笑得好燦爛呢？願意經常鼓勵BB嘅人，通常都更容易受到BB嘅愛戴。咁樣並唔係勸父母唔好管教BB，只係多用鼓勵正面嘅言語去取代責備。

4. 日日都會陪著BB嘅人

有啲在職爸媽會無奈表示，BB同爺爺奶奶比較親。事實上，BB見到爺爺奶奶比爸爸媽媽嘅時間長，自然會感到爺爺奶奶比較親切，更明白自己想要啲咩，不過爸爸媽媽都唔駛太失望，因為咁都表明爺爺奶奶好疼錫孫子，令BB感到安心都係一件好事黎。雖然喺BB心目中位置或者不如爺爺奶奶，但只要做好自己本份，返工見到BB嘅時候接手返照顧BB嘅工作、好好陪BB玩、令BB內心感到父母嘅愛，地位都唔會差呢！