BB與避孕器出世 決心要嚟做媽媽嘅好寶寶

美國有媽媽喺社交網站分享一張，一個啱啱出世嘅BB手持避孕器嘅相，留言話「避孕失敗呀！」引來7萬2千人分享！

Lucy生完2個小朋友後，同老公達成共識決定「唔再生！」，所以就進行避孕手術，喺子宮植入「避孕器」；根據廠商保證，避孕效果高達99%！但喺Lucy第三次植入避孕器後，發現自己已經懷孕18週！

Lucy指：「喺照聲波時都發現唔到避孕器，醫生指有可能已經脫落，但我唔相信。」但Lucy覺得既然避孕後，仍然懷孕，應該係上天送畀自己嘅禮物，所以就決定做3寶媽媽！

結果，Lucy喺剖腹生BB時，發現避孕器，最後避孕器同BB一齊「出世」。唔少網民都留言話「簡直係地表最強BB！」、「戰鬥力超強」、「邊個都唔可以阻止我誕生！」。

Lucy指：「BB並唔係真係手持避孕器出世，只係屋企人覺得好好笑，所以將避孕器放喺BB手中。」而好朋友覺得好好笑，所以喺社交網站分享，無諗過會引來咁熱烈討論，不過Lucy已經決定今次會做輸卵管結紮，因為「唔想再冒一次喇！」

醫生指，一般避孕器都會放喺胎膜外，如果胎膜破裂不甚進入，同容易引起感染，但植入避孕器時其實懷孕機會相當低，今次BB成功健康出世，真係唔簡單！

未準備好做媽媽，避孕措施唔少得，但話就話99%能夠避孕成功，但有時新生命要跟你嘅時候，剩下嘅1%都會有可能中！

Text：Mami Editorial

Sources：INDEPENDENT