餵母乳幾辛苦都好 見到BB滿足就最開心 只有母乳媽媽體會到10個小確幸

餵母乳嘅媽媽都會深深體會到當中嘅難處，如： 要定時泵奶唔係就會脹乳痛、隨時擔心會漏出太多乳汁整濕胸圍同衣服、BB用錯方法吸吮而咬痛乳頭⋯⋯有時都會好羨慕餵配方奶嘅媽媽好自由自在。話雖如此，有啲小確幸只有母乳媽媽先能夠深深體驗到，尤其係以下呢10件事：

1. BB健健康康

母乳裡有來自媽媽嘅抗體同豐富嘅營養物質促進BB各方面嘅發育，所以食母乳嘅BB會腦部發展得較快，身體抵抗力亦會較好。當BB病咗嘅時候，媽媽嘅母乳會分泌出更多抗體，去幫助BB身體抵抗細菌，令BB不藥而癒。見到母乳可以幫到BB健健康康，係媽媽最大嘅滿足感！

2. BB飲奶露出滿足樣

相信好多媽媽喺母乳路上遇到困難時，都會唔止一次同自己講：「不如放棄啦！」但當見到BB一見到奶奶就雙眼發光咁搶住要，飲住母乳非常滿足嘅樣，真係令媽媽甚感欣慰，為咗令BB時刻都咁滿足，媽媽又會再重燃堅持餵母乳嘅雄心壯志。

3. BB一滴不漏飲晒

母乳滴滴皆辛苦，每個母乳媽媽當然最希望係一滴都唔浪費啦！當見到BB如自己所願咁將奶奶飲晒，除咗表示BB完全接收晒媽媽給予嘅營養外，仲表現到BB好鍾意飲媽媽奶，令媽媽非常自豪！

4. BB順利有節奏吸吮乳房

唔係個個BB都可以順利埋身餵，可能要試好多次，BB先識得吸吮嘅方法，媽媽亦要承受好多次因BB嘅錯誤吸吮所引起嘅痛楚，但當見到BB終於都可以埋身有節奏吸吮到母乳，真係會興奮到內心忍唔住大叫：「BB好叻叻呀！」

5. 堅持達到一個又一個目標期限

好多母乳媽媽都會為自己設一個限期，3個月、6個月、1年⋯⋯每當成功達到一個期限，媽媽都會忍唔住俾個叻自己，因為平時3分鐘熱度嘅自己竟然可以為咗BB努力堅持落去，亦會充滿信心去繼續努力完成使命，夢想要餵到BB自然離乳！

6. 見到奶量多咗

母乳媽媽最怕自己會奶量跌，唔夠畀BB飲，所以最開心就係見到自己奶量多咗！可以俾多啲奶奶BB飲喇！

7. 見到噴乳反射

有時擠奶見到乳汁一滴滴乳咁出，媽媽都會苦惱唔知今次要擠幾耐先完⋯⋯一旦見到噴乳反射，乳汁噴射出黎，媽媽都會趁機會起勢咁擠，希望可以快快了事。

8. BB追住媽媽要奶奶

媽媽變成BB嘅食物來源，BB當然會親近、依賴媽媽多啲，經常會搵媽媽（乳房）去獲得飽足同安全感，令媽媽感到自己好被BB需要。

9. 見到雪櫃存貨充足

雪櫃嘅一包包母乳存貨都會令媽媽非常自豪，自己努力堅持先可以畀BB咁多糧食儲備，所以每次一打開雪櫃都忍唔住欣賞下自己嘅成就！

10. 母乳萬能藥

據說母乳仲有好多功能，如紓緩紅疹、改善乾躁皮膚等，簡直係BB嘅萬能藥，見到BB皮膚因搽咗母乳而得到改善，媽媽都會覺得自己好有貢獻！

以上種種都會令母乳媽媽感到，自己有餵母乳真好啊！

Text：Mami Editorial