【懷孕每一階段 都要多謝老公陪伴自己身心理變化】

去到中段嘅時候，相信大家嘅心情都平伏左好多啦～隨之而來既野就係一連串既產檢同埋身體上面嘅變化，呢一個階段可能比起頭3個月嘅時候易過一d，但對於準爸爸媽媽黎講又係另一個挑戰既開始。

大家都可能會覺得產檢點解要多謝老公呢？老公比錢？其實係依家好多媽媽都會一路係政府產檢，都會再搵私家醫生再產檢。好似我咁，一開頭一個月一次產檢，私家同政府各一次，一個月兩次產檢。今時今日想係公司請假我相信係一件好難嘅事，準媽媽請假嘅時候緊係可以大條道理啦；但準爸爸請假係咪一件容易嘅事？可能好多媽媽都會體諒準爸爸要工作，或者係私家產檢既時候，會搵返d星期六或者爸爸放假既日子產檢。

但試問邊一個準媽媽唔想準爸爸陪伴喺身邊，一齊感受同bb嘅一次，例如：第一次聽到佢嘅心跳(當時我同先生第一次聽到bb既心跳時，我地兩個都眼濕濕望住對方,個一刻真係咩都代替唔到)；一齊發現bb既性別(呢個有一件趣事想同大家分享,當日我問醫生以家會唔會知bb既性別架?醫生：其實我見到架啦,我知道架啦～之後佢突然問我地,見到未呀？我地望住部電視,下？邊到呀？醫生就話：下？咁大條都睇唔到？之後我同準爸爸就一齊大笑)；一齊留意bb既每一次唔同既小動作(食手手,d腳仔放到頭仔到)，同埋第一次照3D見到bb既樣，大家即刻討論似邊個似邊個,呢d時刻真係好難忘。我好多謝我先生每一次產檢都陪伴係我身邊同我一齊分享bb既每一個時刻；我相信就算各位準爸爸不可以陪準媽媽去產檢都好,佢地心入面都一定會好掛住準媽媽同bb,佢地都係默默地努力工作比更好既環境比媽媽同bb。

另外一方面就係每一個女性都好緊張既野,就係身材上既變化同埋皮膚既改變。我以為我可以好似d明星咁,有左都可以保持靚靚,可以做一個靚媽媽,但呢一切都係夢。我體重一日比一日重，身型一日比一日大隻；皮膚因爲荷爾蒙既改變,生左好多好多粒粒。見到自己d衫一件一件咁唔岩著；皮膚一日一日咁差,但你又唔可以用暗瘡膏,或者一d比較強既護膚品。當時我真係一d信心都冇,見到街上面同自己年紀差唔多既女性,我就問我先生,我係咪好肉酸,點解人地可以著到靚靚,我就咩靚衫都著唔到。有時候我都會化下妝(以前我成日化妝既,但有左我就少左好多化妝),化妝既用品同方法都係同以前一樣,但因為塊面已經變左肉面飛龍,手手腳腳都變成蘿蔔腳,我點化點著都唔好睇。連我媽咪都忍唔住笑我,有一次我化好哂妝係到照鏡,我媽咪突然對住我笑,我就好好奇咁問佢,你係到笑咩？佢就一路笑一路答,你以家肥到成個豬頭咁,之後再補一句,我講笑咋!

但我先生就一句說話都冇笑過我,每一次我冇信心既時候仲會講：邊到肥呀,仲係好靚呀！

有時我自己話自己肥,自己隻腳好似蘿蔔,佢就會話邊到係蘿蔔呀,係蓮藕!陪我買新既護膚品,陪我一齊食,比起以前仲拖得我更實,有佢呢一支強心針,真係咩都捱得過~

各位準媽媽同爸爸，大家都要比多d信心比大家,懷孕呢一個階段大家雙方都一直好努力,準爸爸要講多D好說話比準媽媽聽,比多d信心佢地；準媽媽都要體諒準爸爸既工作,佢地心入面一定係想陪伴係你地既身邊。如果有準媽媽想知道我私家醫生既詳細資料,可以留言比我。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Doris

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！