懷孕3個月BB大腦發育只有2% BB奇蹟健康長大

能成功健康孕育一個小朋友絕對唔係必然，當發現肚內BB唔健康，被醫生建議終止懷孕時，相信會係做媽媽人生最難決定嘅事。英國有位媽媽懷孕3個月時，被檢查發現BB發育異樣，包括脊柱裂、染色體異常、腦積水，甚至大腦發育只有2%。

媽媽Shelley得知BB Noah發育出現異常後，被醫生5次建議終止懷孕，指：「按BB發育情況，BB出世後將會睇唔到、聽唔到、講唔到同無法進食，生存機會相當渺茫。」但Shelley同老公仍然堅決生下BB。

被問到點解醫生多番建議後，仍然意志堅定，Shelley指：「可能會有人覺得我哋好自私，生下一個唔健全嘅BB，令到佢生活面對好多壓力，但我同老公都係積極嘅人，堅信我哋有能力令到小朋友開開心心享受生命，想畀Noah一個生命機會。」

預產期前一週，Shelley需要住院，因為Noah腦內嚴重受壓，生命有危險；Shelley憶述Noah出世時指：「當日嘅過程係好驚人，手術室入面足足有12個醫生，而且仲有專家為我剖腹，當Noah成功出世後，佢嘅叫聲係相當有力量，我就知我哋嘅選擇係冇錯。」

喺出生後，唔少醫生都放棄幫Noah治療，但Shelley不斷揾醫生幫仔仔做評估，甚至不斷幫佢做運動。

幸運地，之後能夠遠赴澳洲接受神經物理治療，透過物理治療同訓練認知能力，Noah學識坐起身，到咗3歲時，Noah腦部發展奇蹟達到正常嘅80%。宜家6歲嘅Noah發展逐漸正常，下個終極目標係可以行路，同學識滑浪。

醫生都無法解釋Noah嘅情況，形容病例係奇蹟。有人認為Noah可能一開始只係因為大腦集中一邊，導致發育異常，但後來成功移回正常位置發育；但根據依嗰假設，Noah應係重度智障患者，唔可能好似宜家咁聰明，但唯一可以肯定係，Noah證明大腦修復神經系統方面係有驚人潛能，為腦部受損患者帶嚟新希望。

Text：Mami Editorial

Sources：Mail Online