【迎接新生命媽媽情緒易波動準爸爸兼顧事情亦變多】

By Doris on 20 Feb 2019

Hello~大家好,我叫Doris!我係一位90後既準媽媽,仲有15日我就會成為媽媽啦!人生可以展開新既一頁,我真係好開心亦都好興奮。我今年25歲，話年輕又唔係，話我老都唔係，但我知道係成為媽媽呢一條路黎講係比較早。我細細個就已經係一個好想做媽媽既女仔，我好記得我細個成日都會扭計要媽咪買d bb公仔玩具比我玩,等我可以扮媽咪，中一二既時候我同我同學講我想25歲前可以做人媽咪，以今時今日既我可以實現我中學既願望，我真係好開心~

呢一個小寶係上天送比我同先生最好既禮物,由我地努力到發現成功既時間只有短短既個半月。我個陣仲好記得我話比我先生知，佢就黎做人地爸爸既時候既樣子，佢個種開心同埋唔敢相信既樣，我諗我呢一世都會記得。由呢一刻開始,就好多野都需要佢陪我面對，以及一d我以家諗返我覺得佢真係好錫我同bb先會忍讓到既野。

1-3個月既時期：

當初有左既時候，我既心情好唔穩定，可能因為荷爾蒙既關係啦，我成日都發脾氣或者覺得佢對自己唔好。有一次，我要搭小巴由屋企返媽咪屋企既時候，我先生個日同我一齊出門口，但佢工作既關係，唔可以遲到，所以冇車我。我落到小巴站，突然落雨我又冇帶傘，個陣佢岩岩出車，但其實佢係唔會見到我(因為佢係去我既反方向以及佢唔會經過我等車個個小巴站)。當時我好嬲好嬲，覺得點解佢落雨都唔車我或者係咪工作緊要過我，我以家有左佢都咁對我，所以我打電話比佢,發脾氣話左佢一大輪，但當時佢冇同我衝突，好冷靜。當我冷靜落黎，我真係唔知個陣我嬲咩，點解咁嬲，以我更加唔明白當時我先生點解可以咁冷靜,如果個個係我，我已經會癲左，明明唔關自己事都要比人話。

我想借呢件事同各位準媽媽或者準爸爸分享，有時候準媽媽係會控制唔住自己情緒，因為荷爾蒙既關係又或者係我地岩岩知道自己肚入面多左個小生命，無形中我地都大左壓力，情緒一定會有改變；但準媽媽我都想大家知道，準爸爸們都係兼顧好多野，佢地可能處理緊佢地既工作，應付緊屋企準備多一個人既壓力。呢段時間，大家一定要更加支持對方，將大家心入面既說話話比對方聽，錯左一句'Sorry',一個擁抱已經係一個個好好既鼓勵。