BB眼中冇所謂嘅「垃圾」只要鍾意嘅都會送畀媽媽 BB 3個單純又美好行為

BB未受社會價值觀嘅影響，對所有事物或事情都會表現出非常單純又直接嘅行為，以下呢3個BB常做嘅行為，往往令爸爸媽媽感到BB傻得黎又非常可愛！

1. 執地上垃圾會歡天喜地

喺BB眼中，並無垃圾同寶物之分，只要吸引到佢哋眼球，就會拎上手玩弄一番。有時帶BB出街，當BB見到地上嘅糖果紙、落葉、膠袋等，都會好感興趣執黎望下。有媽媽分享BB曾經喺地上執到一塊落葉，喜滋滋咁遞畀媽媽，媽媽先係一呆，但望住BB個開心樣又唔忍心喺BB面前扔咗佢，於是笑住讚BB好乖送禮物畀媽媽，受到鼓勵嘅BB就好開心咁一路行一路執樹葉畀媽媽，媽媽笑言估唔到咁快就收到BB送嘅第一束「花」。大家又收過BB嘅咩禮物呢？

2. 做家務小幫手

好多時媽媽默默一個人做家務，BB睇在眼裡，會不知不覺模仿媽媽嘅行為。漸漸咁，BB就會慢慢學識喺媽媽晾衫時幫手遞夾仔（偶爾自己拎去玩）、幫手喺夾仔上扯啲已乾透嘅毛巾、襪仔落黎（有時大力得濟扯爛夾仔）、幫手將D襪仔放入櫃內（順便將櫃內嘅衣物摷出黎）⋯⋯為媽媽喺家務上增添好多樂趣！

3. 玩煮飯仔餵媽媽食嘢

媽媽餵BB食嘢就多，但BB餵媽媽食嘢，媽媽又有咩感受呢？一旦BB開始玩煮飯仔之後，媽媽就成為BB第一個會餵食嘅對象，每次「炮製」好美食之後，BB總會好認真用匙喺碗內舀，然後送到媽媽嘴邊再配音「UM⋯⋯」，有個咁孝順餵自己食嘢嘅BB，試問媽媽又點能抗拒？

雖然有時會好希望BB可以一直保持住單純嘅初心長大，但係世途險惡，太單純好多時都會受到傷害，轉而希望仔女長大後唔好過於單純、會識得保護自己。作為爸爸媽媽，唯有好好珍惜BB嘅呢段單純日子。

Text：Mami Editorial