26歲女天生無子宮 媽媽為完囡囡做媽媽夢堅持接受子宮移植

成為媽媽可能係唔少女士嘅夢想，但能夠得到一個小生命，又並唔係必然嘅事。內地有位女士先天無子宮，媽媽為完囡囡心願，將自己嘅子宮移植畀囡囡，成功完成移植手術並令囡囡誕下健康男寶寶。

26歲女士楊華（化名）細個嘅時候，因長期未有月經所以就醫，發現原來先天無子宮。對於由細到大都希望做媽媽嘅楊華，簡直係噩耗，其後醫生建議通過移植子宮嘅方式懷孕。當時楊華嘅媽媽就一心想：「哪怕失去我的生命，我都要為我女兒給一個完整的身體，想讓她人生圓滿！」

媽媽一心捐贈子宮畀囡囡，但由於子宮位於人體盆腔深部，血管亦纖細，所以移植手術相當危險，但楊媽媽把握住依一線希望，堅持幫囡囡完夢。

喺醫護人員密切監護下，最後成功進行子宮移植手術，但楊華仍需接受受精卵移植。經過5次嘗試將受精卵移植後，胚胎成功著床，但期間有4次需要進院保胎，最後2000克男BB亦成功出世。

BB出世後，楊華嘅媽媽特別激動，更拎住印上外孫嘅小腳印圖片話：「這是我之前從沒想過的事！我能成功做婆婆了。」

Text：Mami Editorial

Sources：新華網