有咗孩子以後就唔需要慶祝情人節？ 媽媽們渴望老公會做5件事

聽日就係情人節，對於好多已生兒育女嘅夫妻而言，呢個節日好似已經變得冇咩意義，畢竟大家已經由情人嘅關係昇華到老夫老妻嘅感覺，比起送華而不實嘅鮮花、食一餐海鮮價嘅晚餐⋯⋯倒不如回歸平淡，繼續平常忙碌嘅湊仔生活，慳返啲不必要嘅洗費。

不過，媽媽始終係一個女人，見到社交平台上不斷放閃嘅post，即使口講唔好晒無謂錢、買花又貴又唔實際、出面食嘢好貴⋯⋯言語上總係表現大方又理性，但內心難免會暗暗感到失落：「難道結咗婚、生咗小朋友就唔值得被花心思去氹嗎？」老婆，比起女朋友，理應更值得寵愛吧！

正因為不斷搵理由說服老公唔好晒無謂錢，而老公不假思索咁全然接收並讚嘆太太係一個賢妻，理所當然無視情人節，所以好多媽媽對於情人節慢慢變得冇感覺，應該係話已經唔抱任何期待⋯⋯事實上，媽媽內心嘅真正諗法係：「唔需要你晒太多無謂錢去慶祝呢個節日，但希望你喺呢日會花心思同我過！」

1. 送一份小禮物

即使唔送海鮮價嘅鮮花束，其實花少少錢買一份小禮物畀媽媽，一枝花、一盒朱古力、一張卡、或一份別出心裁嘅小禮物，其實已經足以令媽媽感受到你嘅心意而感到心滿意足，起碼畀媽媽知道你冇忘記呢個慶祝日。

2. 為太太煮一餐飯

長久以黎都係媽媽負責煮食、照顧孩子，每日總係忙到焦頭爛額。如果老公願意親自為老婆下廚，相信媽媽會感到比外面嘅高級餐廳更令人難忘同心醉，畢竟一個享受慣老婆侍候嘅男人，竟然願意花時間鑽研食譜同親自下廚，淨係呢份心意都足以令媽媽感到甜入心，至於味道好唔好就將就將就下⋯⋯

3. 同太太出去睇一場戲

有咗孩子以後，無論喺屋企又好、出街都好，都總係三人行。難得情人節，偶爾放低一下小朋友畀親友看管，兩公婆去睇一場期待已久嘅戲、拍下拖、過二人世界其實真係一啲都唔過份！

4. 買一個蛋糕

如果爸爸實在諗唔到揀咩禮物好、無時間鑽研食譜，或大家都唔願意放低孩子出去玩，其實都可以簡簡單單買一個靚靚嘅蛋糕，既令人有慶祝嘅感覺、又賞心悅目，最重要係連小情人都可以一齊享用！

5. 服侍太太

爸爸可以喺情人節呢日盡情表現自己疼愛老婆嘅一面，幫媽媽完成某啲工作，畀媽媽可以有時間好好休息一下，亦會令媽媽感到非常窩心。

祝各位情人節快樂！

Text：Mami Editorial