外國盛行準爸媽去一趟Babymoon 8個事前準備&注意事項

Honeymoon就聽得多，Babymoon大家又聽過未？近呢幾年，外國吹起一股準父母趁BB出世前去旅行嘅風潮，希望藉住呢趟旅行，可以好好放鬆自己、叉足電去迎接新手父母嘅生活，亦係最後一次好好享受二人世界嘅旅行。早前更有人撞到孕媽媽陳凱琳Grace亦潮跟呢個風潮，同老公鄭家穎齊齊出現喺越南芽莊旅行添！認真識嘆！

不過作為孕婦去外遊多少都會有風險，孕媽媽都應該要根據自己嘅情況同聽從醫生嘅建議先決定去唔去，畢竟媽媽同BB嘅安全係最重要！如果孕媽媽喺孕期冇任何懷孕問題、或身體同精神狀況都唔錯嘅話，因而決定同另一半一齊去Babymoon嘅話，亦要注意以下嘅事前準備同注意事項：

1.適航證明

懷孕第13周至28周係孕媽媽去外遊嘅最佳時機，因為孕吐等症狀開始舒緩，肚又未大到令孕媽媽行動不便。外國研究指出，沒有證據顯示搭乘飛機會增加早產、羊膜囊破裂、胎盤早期剝離等懷孕疾病的風險，所以基本上孕媽媽喺呢段時間去外遊都係安全。不過就要留意返選搭嘅航空公司需唔需要孕媽媽出示適航證明。

2. 搵一個飛行時間短嘅地方

長途飛行嘅話，孕媽媽長時期坐喺度又無法伸展身體，容易引起水腫同腰痠問題，非常唔舒服，所以最好都係揀短程嘅地方！同時亦要考慮去交通便利、衛生條件好嘅地方居住，避免孕媽媽喺旅程中不停走動感勞累，或容易生病。

3. 規劃休閒為主嘅行程

好多人去旅行都會為睇更多景點而趕行程，每每令到身體疲累不堪，準爸爸應體諒孕媽媽嘅體力同精神狀況，行程以休閒、散心為主，一日行一個景點就夠，唔好令孕媽媽感到太辛勞，而孕媽媽亦應量力而為。

4.飛行過程中適時補充水分

懷孕媽媽更加要補充水分，可改善機艙內因乾燥而引起嘅不適感。

5.旅程中注意飲食

去旅行容易被當地美食吸引而大吃大喝，孕媽媽要時刻提醒自己保持克制，可適量進食美食，但要切記避免進食或會危害胎兒嘅食物，如容易有李斯特菌嘅未經煮熟食物、或受污染食物等。

6.避免高危活動

唔好玩刺激、過度活動身體或高危嘅活動、亦要避免浸溫泉等會令孕媽媽體溫升高嘅活動，因為體溫過高亦會危害到胎兒，唔乾淨嘅水質亦會容易令孕婦陰部受細菌感染。

7.避免去按摩

喺外國就曾經有一位懷有雙胞胎媽媽因不聽勸告而堅持接受按摩，最終喺按摩後出現抽搐昏迷、雙胞胎不幸死亡嘅悲劇。畢竟人體中有太多穴位，按摩師或媽媽未必會全然了解到每個穴位對胎兒嘅影響，所以盡量避免以策安全。

8. 避免獨自行動

無論去邊都一定要有丈夫陪同，免得忽然出現狀況，又因地方或語言問題而無法獲得即時協助。

Text：Mami Editorial

Photo Source：陳凱琳@IG