前世情人嘅特別待遇 女兒控爸爸嘅3個特徵

好多媽媽表示，生咗女兒之後先發現到老公另一面：平時不苟言笑，為氹女兒願意扮鬼臉；平時脾氣暴躁，當女兒無故哭喊會耐著性子去安撫；平時節儉得很，竟為女兒買一大堆衣衫玩具⋯⋯有時都會令媽媽睇唔過眼，紛紛呻：「平時又唔見你對我咁好？」以下3個係大多數女兒控爸爸嘅特徵，各位媽媽嘅另一半又中幾多呢？

1. 經常講唔畀女兒嫁人

由女兒出世起，爸爸總係對女兒流露出一副濃濃愛意嘅樣，每當聽到媽媽問：「第日女兒嫁咗點算啊？」總會聽到爸爸無厘頭一句：「嫁畀爸爸！」，令媽媽反晒白眼。或有時會無意中出現假想情敵，話「要趕走晒女兒嘅追求者」、「夠膽埋女兒身就死定了！」

2. 對女兒特別用心

平時對老婆嘅自拍總顯出一副冇耐性嘅樣，要幫老婆影相梗係非常敷衍。但當女兒出世後，願意抽時間為女兒影相留念，甚至用手機下載埋整片app，即學即用，為女兒嘅相製成短片、配埋音樂、加埋字幕，最後廣發到Facebook、IG、WhatsApp等畀眾人欣賞。

3.  咩都會原諒

打機、睇波、砌模型係好多爸爸嘅興趣，平時一旦被人打擾而累到鋪機輸咗、睇唔成波、模型少咗一塊⋯⋯連媽媽、老婆都敢開罵嘅爸爸，一旦對象換咗係女兒，即時冇晒脾氣，仲會嘻嘻笑氹女兒，令媽媽大感震驚：「世界變了！」

Text: Mami Editorial