工作係重要 但仔女長大點滴過咗就返唔到轉頭

大家準備好放新年假未？放新年假更係同一家人團年，但往往有啲工作新年假期先係最忙，結果連同屋企人慶祝新年嘅機會都冇，但可能你願意爭取的話，就會成功！

四川有位任職餐飲公司嘅媽媽，答應囡囡放假時去滑雪，囡囡提出能否喺初四生日時一家人去，但可惜媽媽公司因為適逢假日特別忙，所以坦白同囡囡講：「媽媽初二就要返工喇，真係陪唔到你，到時爸爸會帶你去。」

當囡囡知道後，就即刻話要幫媽媽向公司請一日假，但媽媽覺得囡囡隨口講，所以無理會，而且覺得公司假日已經忙到踢晒腳，如果自己去放假好似講唔落去，所以自己都冇打算請假。

結果，囡囡真係為媽媽請假，用自己返學嘅作文紙寫上「請假信」，上面寫住：「親愛的叔叔阿姨，春節快到了，我可以為媽媽請一天假嗎？初四可以嗎？媽媽答應帶我去滑雪，因為媽媽說忙，幾年都沒有去，初四是我的生日，我想媽媽陪我去。再不去雪就化了，我就長大了。」

但估唔到，媽媽公司嘅董事長被囡囡打動，更正式印下一張回覆信，批准媽媽放假一日「親愛的唐芸小朋友，你的媽媽在工作期間，工作認真負責，團結同事，很好地完成了本職工作，表現優秀。特批准放假5天（初2至初6），並批准旅遊基金1000元，讓媽媽陪你一起去滑雪。因為，再不去你就長大了！」

董事長向媒體表示，小女孩嘅請假信感動咗自己，希望其他員工知道如果有需要，係可以向公司爭取。

依張請假信隨即喺內地媒體廣傳，但媒體報道，媽媽最後都婉拒公司批准，因為「不想搞特殊」，但最後結果都要等到初四先知，希望媽媽唔會令囡囡再失望，囡囡長大後就會冇機會同媽媽一齊玩了。

Text：Mami Editorial
Sources：紅星新聞