阿嬌陶醉同老公嘅恩愛生活 期待做媽媽

阿嬌做咗賴太後，幸福生活羡煞旁人。結婚左一個多月後，阿嬌仍然陶醉同老公嘅恩愛生活，更打算希望可以盡快為老公誕下結晶品，但怕自己身體唔易懷孕。

早喺3年前阿嬌已經做咗雪卵手術，可惜因為身體差，只雪得3粒卵，當時醫生再建議做多次手術，但阿嬌因為覺得手術後太辛苦打消念頭，指：「做完雪卵手術後，賀爾蒙失調，足足肥咗20磅！好難減得返，但宜家結完婚真係好想為老公誕下小朋友，有一個完滿嘅家。」

阿嬌除咗為做媽媽努力外，喺準備婚禮時都搞到自己好心煩。事關阿嬌搞左兩場婚禮，但因為相信朋友介紹，以為可以全心畀婚禮策劃人負責，點知最後搞到要麻煩公司同事幫手，仲要自己一手一腳搞婚禮設計，但慶幸最後婚禮可以完美完成，仲有啲淘醉新婚生活。

喺幸福美滿嘅生活來臨前，阿嬌同老公都經歷過一段矛盾關係。阿嬌透露「曾經擔心同老公嘅遠距離會影響關係，自己又係一個極容易缺乏安全感嘅人，但後來老公都提醒，其實雙方信任好重要，而且叫我唔好俾遠距離去影響到段關係。」

阿嬌對老公嘅愛意簡直係滿瀉，曾隔空作出承諾指「愛是承諾及紀念，一旦付出就永遠不要忘記、永遠不要讓它消逝。」相信二人嘅感情會好堅固，好期待聽到阿嬌做媽媽嘅有好消息。

Text：Mami Editorial

Photo：鍾欣潼@IG