新年習俗因住做 唔係樣樣小朋友都可以參與

新年就快到！傳統新年習俗有好多，雖然現代人未必樣樣做到足，但遇到長老要一家人一齊做，都推唔到，有時更會「熱心」邀請埋BB一齊做！

今次就同大家集合咗幾個成日會做嘅習俗，解決下一啲迷思，有時未必真係唔做得，但或者要叫安排活動嘅家人注意下！

年廿八洗邋遢

傳統新年一家就會盡行一年一次大掃除，所有應有盡有嘅清潔用品都拎晒出嚟。有時未必係媽媽做大清潔，有時屋企人會起勢咁用清潔劑，一大陣「清新」嘅味道吸太多可能會唔舒服，曾有人先因同時用潔廁靈同消毒液洗廁所，吸入刺鼻氣體不適入院，所以要提醒屋企人一定要留意唔好用太強味道嘅清潔劑，用漂白水同X露時都要注意份量，BB或者懷孕媽媽必要時可能要避席下呀！

仲有就係用「神奇」碌柚葉沖涼，傳統有指用碌柚葉水沖涼可以消災去病，家人可能會邀請BB一齊沖，媽媽唔洗太擔心，碌柚葉雖然實際無特別嘅清潔功效，亦都唔會有咩害處，除非BB本身有特別過敏情況，如果唔係輕輕沖下涼都無事嘅～

除夕初一要拜神

為祈求新一年得到保佑，家人可能會安排一大壇拜神儀式，甚至帶BB去拜神。拜祭間嘅香燭煙霧一定對BB同懷孕媽媽有影響，如果本身有哮喘疾病或鼻敏感嘅BB更加係可免則免！神明依家嘢係講心嘅，BB醃到隻眼喊晒咁都唔好，所以要減低BB吸入份量，等大個啲先用香燭同神明溝通，同埋拜神時要確保空氣流通。

初一至初三唔洗頭

傳統習俗認為新年頭3日沖涼或者打掃會將一整年福氣洗走晒，但現今社會空氣污染嚴重，新年天氣又回暖，出街拜年接觸嘅人較多，最重要係流感！BB皮膚幼嫩低抗力低，如果唔清潔可能會出現皮膚問題，所以基本清潔係要有㗎！

新年最大願望都係健健康康，開開心心！一切都係講心意，唔好太過執著呀！

Text：Mami Editorial

Photos：Shutterstock