非MC痛嘅生理痛 了解排卵痛嘅原因同6個症狀

明明未到經期，但偶爾會覺得左腹或右腹微微抽痛，雖然未至於好痛，但每次痛都會覺得好唔舒服，亦會非常擔心自己嘅身體狀況，懷疑會唔會係子宮出現唔好嘅變化。如果呢種莫名嘅下腹痛係發生喺排卵期嗰幾日，好有機會係「排卵痛」！

排卵痛症狀

1. 盆下腹部疼痛，大約喺髖骨內，腹部側邊下方居多。
2. 喺月經來之前約兩星期，大約係排卵期前後。
3. 排卵痛可以係左側或右側，取決於邊一側嘅卵巢釋放卵子。
4. 排卵痛可能每月輪流出現喺不同邊，或者好幾個月都係同一邊痛。
5. 排卵痛因人而異，有時會覺得刺痛、悶痛、或是到難以忍受嘅疼痛感。
6. 疼痛大約會維持一星期，每日痛幾次，每次持續幾分鐘。

點解排卵會痛？

卵巢係存放卵子嘅地方，一般卵子被包覆喺卵泡液同卵殼膜中。當卵子成熟後準備排出時，成熟嘅卵泡會喺卵巢一側排出，利用黃體激素令卵泡膜軟化，然後卵子就會由卵泡中噴射出來。呢種爆炸性嘅破卵，會令噴出嘅卵泡液刺激腹膜引起疼痛，形成排卵痛。不過，有啲女性喺排卵期唔會感到任何症狀，據研究統計只有50%嘅女性會有排卵痛，而且亦唔係每個月都會有，大部份都係偶發事件。

其他造成排卵痛嘅理論

• 卵子成熟後嘅卵破裂，可能導致輕微出血，呢啲血同液體流入腹腔刺激組織，引發排卵痛。
• 排卵時破卵過程嘅衝激造成好似瘀傷嘅排卵痛現象。
• 輸卵肌肉收縮引起排卵痛現象。

想懷孕，排卵痛係好現象！

研究發現，約7成排卵痛，都發生喺腦下垂體嘅黃體刺激素突然升高嘅一剎那，而有排卵痛嘅女性，約9成以上喺24小時後一定排卵，如果想懷孕嘅話，就應該好好把握24小時後會排卵嘅黃金時間！

排卵痛雖無害亦有可能係身體警號

大部分情況下，排卵痛係無害，不過如果係嚴重或長期嘅下腹疼痛或其他部分疼痛，可能係由其他問題導致，應儘快向婦科醫師諮詢，可能症狀包括：

• 輸卵管發炎
• 慢性骨盆炎
• 子宮內膜異位症
• 卵巢囊腫
• 子宮外孕
• 䦨尾炎
• 其他胃腸道問題（潰瘍穿孔，胃腸炎，炎性腸病）

點樣紓緩排卵痛造成嘅不適？

• 多休息、放鬆心情。
• 平時減少鹽分、咖啡因攝取可減少排卵疼痛發生。
• 用熱水熱敷或沖熱水涼（但亦有人覺得冷敷效果好，可自行嘗試熱敷或冷敷，搵出對自己有效果嘅方式。）
• 如果疼痛得無法忍受，應尋求婦科醫生治療。

Text：Mami Editorial