棄嬰體內有吸入毒品 美國愛心媽媽決心收養

美國有位不孕媽媽接連收養兩棄嬰，意外發現原來2位係親兄妹，令依位媽媽更加決心要畀2個小朋友一個家。

Katie Page一直夢想能夠擁有小朋友，但結婚後發現自己患上不孕症，亦喺30歲多離婚。Katie決定實現夢想，申請成為寄養媽媽，先助養4名小朋友。之後就收到社工消息指，4個月大男嬰Grayson被棄，問Katie能否收養。

Katie到醫院後一見到Grayson就有好大親切感，覺得Grayson好甜蜜而且好乖，形容自己同Grayson相遇好似墜入愛河，所以就決定收養，喺2017年正式成為Grayson合法養母，當時Grayson已經2歲。

完成領養一個月後，Katie又再收到社工電話，指又有一名女嬰Hannah不幸被遺棄，Katie趕到醫院後發現，BB囡手帶所印嘅媽媽名同Grayson一樣，懷疑兩人有血緣關係，但兩位BB嘅手帶印嘅係相同媽媽名不同姓氏，所以無法即時肯定係兩兄妹。

Katie其後幫佢哋驗DNA，發現原來真係兩兄妹，原來係生母喺入院時偽報姓氏，Katie指：「當我一發現佢哋係兩兄妹，我知道我絕對，而且一定要一齊領養佢哋，要比佢地團聚同一個健康嘅家。」

Grayson同妹妹Hannah健康嚟到依個世界絕對唔容易，醫生發現原來佢地身體內有甲基苯丙胺，即冰毒，估計係媽媽懷孕時吸入毒品，導致BB體內亦有。

Katie希望今年可以為Grayson同Hannah增添多一個5個月大嘅弟妹，圓滿自己做媽媽心願之餘，給予有需要嘅小朋友一個温暖嘅家。

Text：Mami Editorial

Sources：ABC News