靠囡囡堅定意志英國母乳媽媽破山脊探險比賽紀錄

By race.cheng on 23 Jan 2019

英國有位母乳媽媽，喺生完BB 14個月後參加被稱為「英國最殘酷」（Britain’s Most Brutal）山脊探險比賽，賽道全長431km，並需要喺7日內完成比賽。跑手媽媽Jasmin Paris喺比賽期間仍不忘為囡囡提供母乳，喺每個檢查站泵奶。

Jasmin喺全程比賽只花咗7個鐘休息，當每位選手喺檢查站休息同補充體力時，Jasmin就爭取時間泵奶，並交畀老公餵囡囡。Jamin指：「喺比賽前曾經計劃同BB斷人奶，但之後BB病咗，只肯飲人奶，我仍知道人奶可以幫助佢康復，所以堅持喺比賽仍然泵奶。」

喺比賽途中，Jasmin同一般母乳媽媽一樣出現漲奶，更因為咁樣令到Jasmin落後，但Jasmin無放棄，更話：「我知道囡囡喺終點等我，而且喺每個檢查站可以泵奶都舒緩咗唔少。其後，因為開始減少奶量，唔舒服嘅問題減少，我可以追返時間。」

Jamin最後成功打破大會紀錄12多個鐘，擊敗咗嚟自15個唔同國家嘅136名對手，當中包括125名男子。Jamin憶述指：「其實喺比賽進行24小時後，我開始出現幻覺，一直見到有動物出現喺每塊岩石上面，而且唔記得咗自己喺度做咩。但突然諗起囡囡又再刺激到自己，所以成功完成比賽。」

Jamin其實只係業餘選手，全職係一位獸醫，所以今次嘅比賽結果震驚咗好多專業跑手。奧林匹克選手Jo Pavey表示：「Jamin嘅表現真係好鼓舞人心，見到Jamin衝向終點後，第一時間同囡囡擁抱，就知道嗰股力量喺邊嚟！」而Jasmin仍相信自己嘅故事可以鼓勵到更多母乳媽媽，遇到咩困難都唔緊要，因為仔女等?我哋！