BB出街總係又興奮又唔受控 令爸媽非常狼狽嘅3件事

當BB識行之後，爸爸媽媽都會樂於帶BB外出睇更多事物，感受更多唔同嘅氣氛。而對於BB黎講，外面係同屋企完全唔同嘅花花世畀，眼內盡係未見過嘅新鮮事物，BB好容易會興奮過度，周圍亂跑亂摸，完全將阻礙自己行動嘅爸爸媽媽拋諸腦後。面對呢個猶如脫疆野馬嘅心肝寶貝，爸爸媽媽嘅心情都不禁矛盾起黎。一方面因BB開心而開心，另一方面因BB嘅行為而擔憂，尤其是當BB做出以下3個行為。

1. 唔畀爸媽抱／拖手

當BB興奮過頭，會想周圍去同拎自己感興趣嘅事物，呢個時候爸爸媽媽想出手阻止、拖走BB或抱起BB，忽然被中斷舉動嘅BB會非常唔開心，然後出盡氣力掙扎，唔肯再畀爸爸媽媽限制自己嘅行動，爸爸媽媽只好緊緊跟喺BB身旁，需要時就將BB抱走處理，呢個情景都令爸爸媽媽深深感受到BB根本係一隻脫疆嘅野馬！

2. 喺店鋪／人群中左穿右插

爸爸媽媽最擔心嘅莫過於係BB一落地就一去冇回頭，尤其是超級市場、百貨公司或人多嘅街道。喺眾多商品同人群中，BB容易左穿右插而大人就會經常被擋住，經常令爸媽心驚膽跳，最怕失去BB嘅小小蹤影，而BB就好似好享受同爸爸媽媽玩貓捉老鼠嘅遊戲。

3. 不停拎／整跌店鋪物品

有時當BB快快行入到店鋪內，十居其九都會被眼花繚亂嘅商品吸引，喺鋪頭入面東摸摸西掂掂。爸爸媽媽要一邊收拾好被BB整亂嘅商品，一邊喺狹窄又多人嘅店鋪內捉住呢個小魔怪，仲要不停同周遭店員同顧客講唔好意思，可謂狼狽至極。當最後想抱走BB之際，發現BB手上已經有一樣唔知喺邊拎起嘅商品，一旦想強行拎走BB手上嘅嘢，唔甘心嘅BB仲會駛出海豚音攻擊⋯⋯

雖然每次同BB出街，爸爸媽媽都會覺得好似打完仗咁攰，但見到BB笑得開心，就咩都抵返晒！但一定要注意安全哦！

Text：Mami Editorial