【伊利沙白醫院第一次產檢流程分享】

懷孕心得爸媽分享

By 包媽雲妮 on 17 Jan 2019

曾為娛樂新聞主播、現為傳媒人、主持、blogger，婚後再多幾重身份。一直喺FB Page雲妮手扎分享工作及生活點滴，希望同大家分享人妻、懷孕、育兒點滴。

每位準媽媽見到驗孕棒上兩條線，心情都會又驚又喜，之後就係一連串忙碌嘅開始。好在去到邊，呢位神隊友都喺身邊陪住！

先去診所拎懷孕証明，之後就可以去排公立醫院產前檢查啦。每間公院婦產科安排都不一樣，正常大家只可以憑住址証明跟地區到相應醫院，不過唔係間間醫院都有婦產科服務：

九龍區：伊利沙伯醫院、瑪嘉烈醫院、廣華醫院、聯合醫院
新界區：威爾斯親王醫院、屯門醫院
港島區：瑪麗醫院、東區尤德夫人那打素醫院

正常依家係不接納跨區生bb（網上見過有人話得，但點解得就不得而知啦。）而公務員、醫管局員工及其家屬，可以排QE、威院及瑪麗醫院，我就選擇去QE L座產檢。

QE公務員或家屬婦產科登記，可fax或親身前往。登記處L座1樓

咁啱出開佐敦，所以4W5D我親身去QE L Block預約

可預約時間係一至五0900~1700，LUNCH 13至14無人

要帶：身份證，住址證明以及懷孕證明，接納家計會証明手寫LAST M日期

拎到兩個期: 10W左右見姑娘，及26W左右見醫生，至於唐氏結構糖水期，會喺第一次見姑娘時再check，有期先會俾。好記得登記嗰位男職員笑容相當親切，同我地解釋每個期要做咩帶咩

10W1D係第一次公院產檢日子，排到最前嘅9點timeslot，0845到，0900登記，0905叫名入房見助產士，老公可以陪同入內。姑娘先問症check一次父母家族病歷，再講解QE各種檢查嘅原因安排同如何檢查，抽血驗尿係驗D咩，分娩時減痛方式選擇及風險，同埋講咗十次「你都知香港地資源有限唔係個個有」明架啦明架啦哈哈~

QE唐氏通常喺12周左右檢查，而結構會喺21W至22W6D進行，因為香港法例規定人工流產要喺24周或之前進行，方便拎2nd opinion同埋約期做手術。

最後姑娘幫手喺電腦check期，幸運地唐氏結構糖水期都有，到26wk先第一次見醫生，網上好多人都有微言覺得太遲，不過當日姑娘就話：「其實大約隔5-6星期會見你一次，只係唐氏結構中間隔得比較耐，你可以自己出去搵私家產檢一次。」睇返手上日期又好似係喎，不過為安心計每個月都會私家產檢嘅~~~QE唐氏及結構會喺B座3樓，由護士長執行檢查。網上成日聽人講公院有排等，估唔到咁早可以睇完，姑娘好好人呀仲同我地吹水，TOTAL足足35分鐘﹗