1歲BB冇耐性點算好？ 訓練BB學會等待嘅3個方法

好多爸爸媽媽會覺得BB總係冇咩耐性，肚餓要即刻有奶飲、想要嘅玩具要即刻拎到手⋯⋯遲少少都會大聲哭喊，非常頭痛！事實上，BB本來就會用哭鬧去表達自己嘅需求同欲望，呢個係自然不過嘅事，所以同BB講耐性簡直係對牛彈琴，家長應諒解BB呢個時期嘅「冇耐性」。隨著BB長大，會逐漸對時間有概念，爸爸媽媽就可以用以下3個方法慢慢培養孩子嘅耐性：

1.準備餐前嘅小習慣

習慣每次喺BB進餐前，完成一啲小活動，如為BB洗乾淨雙手、圍上飯兜等，令BB有進餐嘅心理預備，慢慢適應有規律嘅進餐模式。BB會明白到只要完成晒餐前小活動，就係食嘢嘅時候，從而學識等候同培養耐性。

2.轉移注意力

喺等候期間，如果發現BB開始唔耐煩，爸爸媽媽可以試下用說話或小玩具轉移BB嘅注意力，如問問BB：「你睇下媽媽手上嘅係咩黎？」、「嘩！碗裡面有好多唔同顏色嘅食物，係咩黎㗎?」BB會輕易被眼前事物吸引，並投入當中，減少爆發負面嘅情緒。

3.多讚賞孩子

如果BB喺爸爸媽媽忙緊唔得閒回應自己嘅時候，只扭一陣計然後安靜做自己嘅嘢，如玩玩具、睇圖書等，爸爸媽媽應及時用讚賞來肯定BB嘅耐心，令BB知道原來等待係一件好叻嘅事黎，會對BB起到積極鼓勵嘅作用！

Text：Mami Editorial