後悔無打無痛 隋棠BB?力出世搞到鎖骨骨折

好多媽媽都會聽過「生完第一胎，之後就會好好生」嘅說話，原來未必嗰個都咁好采。台灣藝人隋棠上月生完後，分享咗篇第3胎生產記，整個心得都係後悔自己太輕敵，仲要畀老公激親！

隋棠鑑於有生過2次嘅經驗，自信以為自己捱到產痛，仲覺得生第2胎嘅時候肯定係最痛，抱住「絕對不可能更糟了啊！」嘅心情迎接第3胎。

產檢時隋棠多次同醫生討論重點，希望可以用最自然方法生產：靠自己嘅力量生、唔好有任何外力介入，包括壓肚子或產鉗、真空吸引、剪會陰等等都唔要，結果整個生產都反覆後悔。

由於生產前嘅共識，即使隋棠生產途中相當後悔，好想有人幫忙，但都無人理會，任由隋棠自己自然生產。

隋棠老公當時陪足老婆16個鐘，覆述老公指，當時眼見老婆好似係到進行一場「慢速嘅無止盡凌遲」，但根據上次生產經驗，老公完全唔夠膽多講一句說話，知道要盡量將四周嘅氧氣留畀老婆，又覺得生產中嘅媽媽容易激怒，所以完全只係隔離緊握自己隻手。

最後喺「極痛一小時」，BB終於出嚟，邊痛邊喺內心反悔無助吶喊嘅隋棠，當時心情就係：「誰來擠一下我的肚子拜託？！快幫忙把那小子擠出來！我快崩潰了！我好像要昏倒了！」但回到現實，醫護人員除咗盡力地專業鼓勵同引導外，都無任何幫助，隋棠形容自己當時就好似一條就快死嘅魚「又痛苦又絕望嘅翻滾掙扎」。

但可惜，隋棠自以為BB已經出嚟，又突然再痛起上嚟，醫生發現，BB只係頭出咗嚟，但肩膀卡住咗，仲得閒講笑話：「肩膀好寬，以後可以打橄欖球⋯」

最終，隋棠終於生到3700克嘅壯碩BB，但BB為咗奮力擠出媽媽狹窄嘅骨盆結果導致鎖骨骨折。

而回過神後，隋棠立即關心一下從頭到尾站喺身邊、同一直比自己緊張嘅老公，點知老公對住隋棠講：「baby，好恐怖喔！」隋棠又自以為係因為太多血所以嚇親老公，結果原來唔係：「是Olie只有伸一個頭出來在妳兩條腿間那個畫面。」隋棠最後只能夠笑而不語，但都開心BB健康出世喇！

Text：Mami Editorial

Photos：隋棠@Facebook