親友想抱BB但BB驚到大喊 4個方法減輕BB陌生焦慮

相信父母都會遇過，當親朋好友專程嚟探訪BB，BB都會眼仔碌碌望住初次見面嘅人，但當要被親友抱起嘅一刻，BB就會大喊不止，令場面相當尷尬。BB「怕生保」最常出現喺半歲以後，全因呢個階段嘅BB已經識得辨認熟悉同陌生嘅面孔，對著熟悉嘅人會感到安全感，相反面對陌生人，就會因唔確定安全性而感到焦慮。想減低BB嘅焦慮情緒，爸爸媽媽可以嘗試以下4個方法：

1. 家長抱著BB坐

面對初次見面嘅親友，BB好多時會感到不安同害怕，呢個時候爸爸媽媽可以先抱著BB坐，令BB感受到有熟悉嘅人喺自己身邊保護自己，令安全感提升，然後爸爸媽媽再同親友閒談，呢個時候BB會觀察著陌生人嘅一舉一動，判斷呢個人有冇危險性。

2. 請親友慢慢同BB互動

當親友見到BB嗰陣，通常會表現得好熱情咁包圍著BB，甚至想伸手親近BB，但忽然成為陌生人焦點所在嘅BB會感到好驚慌而哭喊。所以爸爸媽媽應喺親友入屋嘅一刻，先邀請佢哋坐低閒談／飲茶，等BB慢慢習慣眼前嘅陌生人，再請親友同BB互動一下，循序漸進嘅接觸可以減低BB對眼前人嘅緊張情緒。

3. 父母喺BB面前同親友接觸

BB知道熟悉嘅人唔會傷害自己，但唔清楚陌生人嘅一切，所以初次見面會感到有威脅性。爸爸媽媽可以喺BB面前先作示範，同親友握手擁抱等，令BB知道同親友接觸係唔會受到傷害。而親友可以同BB肢體接觸前先同BB玩遊戲，令BB感到同眼前人相處係開心，然後會安心接受親友嘅觸碰。

4. 見到BB喊唔好過份緊張

其實好多時BB嘅焦慮情緒都好受父母嘅態度影響，如果BB喊嘅時候，爸爸媽媽嘅反應好大嘅話，會令到BB更加緊張，而喊得更厲害。爸爸媽媽亦唔好因為BB怕生保而減少帶BB出街，反而應該多啲畀BB接觸新面孔，令佢哋更習慣面對陌生人，減少不安感。

不過家長都要留意，如果BB真係好抗拒陌生人嘅接觸，千祈唔好勉強BB去用親友接觸，否則只會令BB更害怕見到陌生人，最後弄巧反拙！

Text：Mami Editorial