台灣BB確診胃穿窿 媽媽痛心提醒勿掉以輕心

台灣有媽媽喺聖誕節誕下仔仔後，發現仔仔喺出世第2日持續嘔奶，嘔出嘅量仲比飲嘅多，當時婦產科護士聲稱係正常嘅「嘔羊水」，但其後仔仔更出現血尿，轉院救治發現原來係死亡率極高嘅「胃穿窿」。

BB係12月25日聖誕節出世，本來係普天同慶嘅日子，但竟然變成惡夢嘅開始。媽媽憶述指，BB出世後就開始一直嚴重嘔奶同嘔水，唔係普通溢奶，而係好似噴泉咁嘔，當時媽媽立即同護士講，但得到嘅回答係：「可能肚仔入面仲有羊水，所以看會咁嘔奶，嘔出嚟對佢嚟講好」

但到BB出世第4日，醫院指BB情況唔好，建議媽媽轉院，但護士仍然指BB係腹部腫脹。到大醫院後，醫生進行一連串檢查，發現BB係胃部有問題，半夜立即進行緊急開刀。

外科醫生指BB可能出現嘅情況有3種：1，係腸壞爛，開刀切除破嘅部分就可以。 2，係腸扭轉，如果壞死部分嚴重，就要裝人工肛門 。3，係致死率最高嘅情況就係「胃穿洞合併腹膜炎」，即胃穿窿。

手術進行一半時，爸爸媽媽被叫到進入手術室，指BB係「胃穿窿」，即最壞嘅情況，當時BB胃部破裂處達10cm，而且不斷流出咖啡色嘅液體，間接腐蝕腸，並令腸內細菌發酵，導致胃同腸嚴重發炎，同時BB心跳過快、血氧濃度低、血壓不穩等循環系統問題，加上排尿問題，令BB全身水腫。為防腎臟失守，醫生緊急為BB駁上洗腎機，分擔腎臟負荷。

雖然手術後，媽媽仍然相信BB能夠好返，但可惜第二日，醫生指BB情況不穩定，媽媽指：「當下只覺得好似要失去BB」BB全身插滿喉管接受急救「成條頸、頭、胸口都係管，當時心入面不斷怨恨，佢先出世幾日，點解要受盡折磨？」

歷盡15日病苦，BB最後都要回歸天國，媽媽見住BB情況變差，更親眼見到BB上氣唔接下氣掙扎嘅樣子，已經傷心欲絕，媽媽指，從BB出生到現在 ，只抱過一次，但老公從BB出生到病連抱都未抱過，希望藉仔仔提醒大家「唔好忽略小朋友嘔奶或是任何覺得無咩事嘅徵兆」，因為後果可以關乎生死！

Text：Mami Editorial

Source & Photos：爆料公社