湊初生BB最辛苦係咩？ 4件最令新手父母暗暗叫苦嘅事

好多父母會反映，喺BB 1歲以前嘅嬰兒時期當中，覺得最艱難嘅時期莫過於係照顧初生BB，以下呢4件事都係最考驗爸爸媽媽嘅能耐：

1.日喊夜喊

最令新手父母感到彷徨又心累嘅，莫過於初生BB嘅生理時鐘係不分日夜，可以日喊夜喊但未必係因為想飲奶，特別係零晨時分聽到BB喊，但餵完奶BB都仲係喊唔停，唔知BB係因咩而喊嘅爸爸媽媽會覺得好無助。

2.幫BB著衫

初生BB手腳纖細又脆弱，爸爸媽媽幫BB著衫嘅時候，要捉實BB嘅手套入衫內，都會好擔心大力得濟屈親BB嘅手腳。

3. 剪指甲

初生BB經常會用指甲搲傷自己塊臉，所以爸爸媽媽經常會用嘅方法就係為BB戴上手套或定時幫BB修剪指甲，BB嘅手指甲通常長得好快，但偏偏手指甲非常非常細小，令爸爸媽媽每次為BB剪指甲都要打醒12分精神，好怕一唔小心會剪得太入。

4. 掃唔到風

初生BB嘅食道同胃之間嘅「幽門」仲未發育成熟，所以飲完奶之後會好易嘔奶，呢個時候BB平躺嘅話就會增加窒息嘅風險。正因如此，BB每次飲完奶之後，爸爸媽媽都一定要為BB掃風，令BB嗝出嚟。不過，掃風非常考驗爸爸媽媽嘅耐性，有時掃風掃足半個鐘，轉晒唔同嘅姿勢，BB都未必會嗝得出。

Text：Mami Editorial