對付小朋友唔願起身嘅4個絕招

想叫醒喺被窩入面嘅小朋友起身番學，一啲都唔容易，特別係喺冬天凍冰冰嘅日子，就難上加難。除左重覆提醒佢地再唔起身就會遲到之外，不如試下用一啲有趣嘅方法叫佢地起身，等大家都可以喺開心嘅氣氛底下開始新嘅一日啦。

1. 播小朋友鍾意嘅歌

小朋友聽到自己鍾意嘅音樂，心情好之餘，仲可能會跟住首歌唱，唱下唱下就會醒晒。

2. 扮怪聲講野

不妨試下扮一啲怪聲，例如扮佢鍾意嘅卡通人物叫小朋友起身，佢地會覺得好奇怪，起身睇吓發生咩事，又或者會好開心，起身同你一齊扮。

3. 不停咁錫小朋友面珠

比起不停咁講「起身喇～夠鐘起身喇～」，不停咁錫吓佢地嘅面珠，都係一個好方法。嘈醒佢地得嚟，又有溫馨嘅氣氛。

4. 準備美味嘅早餐

對於為食嘅小朋友，美味嘅早餐係令佢地起身最好嘅工具。

呢4個方法未必次次都有效，不過試多幾次，相信慢慢就會了解到邊種方法比較容易叫醒小朋友。

Text: Mami Editorial