公公婆婆貼心照顧女兒同外孫 令出嫁女兒滿滿感動嘅3件事

自小喺溫室中長大嘅女兒，對於每日可以喺屋企食飽著暖、一切家務有媽媽代勞嘅生活感到理所當然，未必識得感激父母嘅付出；直到成為人母後，先真正明白到為人父母嘅唔容易，原來以前無憂無慮嘅生活、父母默默為自己做嘅一切，都只係基於佢哋對子女無條件付出嘅愛，而呢份愛係永不止息，即使大家已經分開住，但父母仍然會用另一種方法，繼續照顧自己嘅女兒。

1. 幫忙湊孫

由大肚到坐月，最緊張照顧自己飲食嘅莫過於係身為過來人嘅媽媽，即使自己喺以前嘅年代唔識進補嘅食療，但會為咗女兒健康而周圍去問、去學。直到BB出世後，當所有人嘅焦點都放喺BB身上，只有媽媽會第一時間關心產後女兒嘅身體同感受，細心為女兒準備坐月嘅補品。榮升為公公婆婆嘅父母，即使同女兒唔係住埋一齊，但仍會抽時間嚟幫手湊孫，叮囑女兒好好休息，令產後情緒不穩嘅媽媽感到為人女兒嘅幸福感。

2.整補品

產後嘅媽媽身體虛弱又要照顧BB，未必有時間為自己製作進補食物，亦唔清楚食咩補品或點選購食材好，好多時都會為咗照顧BB而忘記自己嘅身體狀況。呢個時候有可靠嘅婆婆為自己送上湯水、薑醋等加速身體恢復嘅食療，會令媽媽感到非常感動。

3. 關心自己

做咗媽媽後，無論係照顧BB、夫妻相處、婆媳糾紛上，都總會累積好多壓力同負面情緒，令媽媽好想做返以前無憂無慮嘅女兒。公公婆婆總會默默聽女兒傾訴，心痛女兒嘅辛勞同壓力，然後好好安慰女兒、一齊去散步、或煮一餐女兒最愛食嘅餸菜，令女兒排解壓力、重新振作，繼續照顧好自己嘅家庭。

Text: Mami Editorial