TheRock留言尊敬所有媽媽 鼓勵男士要盡力展現支持

荷里活男星狄維莊遜Dwayne Johnson（The Rock）一身肌肉，一見佢外表就好自然聯想起「強悍」或「大男人」嘅形象，但原來現實中佢相當温柔，對住老婆同囡囡更會變到毫無抵抗力，完全展現鐵漢柔情嘅一面！

46歲Dwayne Johnson曾經離婚，其後同現今女友發展，雖然兩人未有結婚，但關係相當甜蜜，女友Lauren為Dwayne Johnson生下兩個女女，Lauren因為餵哺母乳同湊女搞到手忙腳亂，忙到連自己要食飯都唔記得，Dwayne Johnson見女友咁忙，決定自己親自餵老婆，喺社交網站帖文話：「媽媽雙手忙住餵女女同湊女女女，所以就由我餵老婆食飯喇！而且係我嘅榮幸。」（Mama has her hands full nursing/feeding Baby Tia, so I’m feedin’ mama her dinner. My pleasure.）

Dwayne Johnson咁窩心嘅舉動真係令好多人羨慕！其實好多媽媽都知道照顧BB真係好難甩身，如果要餵母乳仲會更強嘢做，Dwayne Johnson都留言話：「好尊敬女友Lauren同其他媽媽每日為仔女奔波，總是堅持並做好所有事情。」仲提醒自己做爸爸都要做好本份，同時要好好照顧另一半。

喺大銀幕上Dwayne Johnson「硬漢」嘅形象深入民心，但私下浪漫嘅故事亦多不勝數。當初Lauren生完細女，Dwayne Johnson就喺社交網站帖文：「給各位男士一句話，生產過程中陪住另一半係好重要，請你盡有所能力去展現支持，並握住對方嘅手！依個行為會改變你嘅一生，從此對女人抱住無限尊重同景仰」

Dwayne Johnson喺第一段婚姻中亦有育有一女，關係亦不錯，現時兩個細女都認識大姐姐。當初同前妻分開亦是和平分手，兩人離婚後亦曾經結伴出席公開活動，再見亦是朋友。

Text：Mami Editorial

Photos：TheRock@IG