仔仔反覆發高燒 陳敏之心如刀割

衞生署已公布香港正式踏入冬季流感高峰期，陳敏之仔仔喺除夕倒數後，唔小心中招，搞到敏之超自責，喺社交網站帖文叫大家都要小心，注意身體健康。

天氣時凍時熱，前幾日聖誕假期仲要有埋寒冷警告，小小唔小心都可能會中招，小朋友玩到忘晒形就更加容易病。敏之喺除夕帶住仔仔同一班朋友跨年，但可能玩得太夜，仔仔休息唔夠，結果打敗仗。

敏之指，仔仔一直高燒，燒到塊面紅卜卜，食完藥都退唔到燒，病情一直反反覆覆。去睇醫生後，發現原來中咗流感，見到仔仔受苦，敏之心如刀割，自責自己帶仔仔玩得太夜，叫大家唔好似佢，如果身體唔舒服要記得睇醫生！

敏之仲温馨提示，提醒大家預防嘅方式，要保持喉嚨濕潤，因為喉嚨黏膜乾燥，病毒就會喺10分鐘內入侵身體，每次要飲50-80cc嘅温水，小朋友就飲30-50cc，見喉嚨乾就千其唔好忍忍下，唔好以為一次過飲好多水就可以，而係要要一直保持喉嚨濕潤。

流感特點會令小朋友快速高燒，而且唔易退燒，爸爸媽媽們要小心屋企大家大細老人，小心全中！

Text：Mami Editorial

Photos：陳敏之@IG