老公容易愈幫愈忙嘅5件事

俗語話：「男主外，女主內」。去到現今世代，講求男女平等，一個家並唔係單靠爸爸賺錢、媽媽處理家事。

然而，呢個俗語並唔係無根無據，因為男性係處理家事上的而且確不及女性。唔知各位媽媽有冇發現老公有時會好心做壞事、愈幫愈忙呢？

1.洗奶樽嗰時

以為洗奶樽同洗碗一樣無難度，諗住老公一定做得黎。到需要用個時，見到洗碗盤無哂奶樽，奶樽消毒機開著左。滿心歡喜以為老公做得好好，點知一打開奶樽消毒機，見到 — 無拆奶咀頭！唯有死死氣洗過再消毒過。

2.換尿片嗰時

換片呢回事係每個爸爸媽媽必然要識嘅事，但換片亦係危險度極高嘅事。唔知咩緣故，爸爸換親尿片都會比BB請飲茶。雖然媽媽無飲到，但善後工夫係由媽媽負責。

3.氹瞓覺嗰時

BB成日蝦媽媽，對住媽媽就好扭計。有機會緊係留返比爸爸氹BB瞓覺啦！但交個任務比爸爸通常只有兩個結果：一，爸爸同BB玩，玩到BB愈黎愈興奮，毫無睡意。二，爸爸成功氹到自己瞓，BB就繼續有自己眼光光/喊。

4.洗衫嗰時

BB唔再係初生階段，啲衫仔唔需要手洗，諗住老公幫手用洗衣機就一定無問題？一係就將BB衫同大人衫放埋一齊洗，一係就「眼大睇過龍」將BB嘅尿片放埋入去洗⋯

5.接放學嗰時

家務事都係留返比媽媽呢個女人仔做，爸爸都係落街行下接小朋友放學啦！點解過左大半個鐘仲未返架呢？原來爸爸排錯隊接放學，排到先知道自己記錯小朋友咩班⋯爸爸一唔係排錯隊，就係接完放學之後同小朋友去買玩具、買零食，買到過哂鐘不特止仲買埋好多無謂嘢。

Text：Mami Editorial