香港進入流感高峰期 6個護理患病嬰幼兒嘅方法

衞生防護中心喺噚日（2號）宣布香港已踏入流感高峰期，而喺各年齡群組之中，以0至5歲兒童確診感染流感而入院嘅比率係最高。為避免BB感染上流感，爸爸媽媽應避免帶BB去人口稠密嘅地方，如家中有人有傷風感冒嘅症狀，應先清潔雙手同戴上口罩再接觸BB；如BB不幸已有流感症狀，爸爸媽媽應速帶BB求醫，避免病情惡發，其後喺屋企亦可以用以下方法照顧患病BB。

1. 及時降溫

大多數BB患咗流感都會出現發燒，爸爸媽媽應避免畀BB著太多或太厚嘅衫，定時用溫水為BB抹身幫助降溫，亦可以用口服或塞肛藥物為BB退燒，如BB出現高燒不退（39度或以上）或抽筋嘅症狀，就需要帶BB回診。

2. 為嬰孩補充足夠水分

發燒嘅BB需要補充足夠嘅水分，爸爸媽媽應按醫生指示每日隨時為嬰孩補充適量水分。

3. 讓嬰孩充分休息

患病嘅BB會表現疲倦、脾氣暴躁，爸爸媽媽應盡量保持家居安靜舒適，畀BB可以充分休息。

4. 餵食流質食物

患病中嘅BB亦會出現食慾不振嘅情況，如BB已開始加固，建議每餐可改成容易吞嚥嘅流質食物，所有食材都盡量攪碎。

5.用吸鼻器清理鼻水 

BB唔識自己擤鼻涕，而鼻水倒流有機會令病情惡化，爸爸媽媽可利用吸鼻器幫BB保持鼻腔暢通。

6. 家人注意個人衛生

同BB同住嘅屋企人必須要注意個人衞生，包括常洗手、小心處理自己同BB嘅口鼻排洩物，抹過痰或鼻涕嘅紙巾唔好隨處亂放，以免互相感染。

Text：Mami Editorial