李光洙與李善彬喺節目結緣 承認熱戀5個月

有韓國媒體報道，綜藝節目《Running Man》主持人李光洙同24歲女演員李善彬拍拖5個月，而雙方經紀公司已確認消息屬實。

33歲李光洙喺《Running Man》節目中有「亞洲王子」之稱，深受亞洲粉絲愛戴，但喺節目入面就一直擔當「背叛者」角色，而且成日被其他主持人笑指戀愛技能極差，從來都係單戀他人。另一主持人劉在錫，更指私下成日教光洙點追女仔，睇嚟今次光洙真係得到愛神眷顧喇！

李光洙同李善彬喺2016年9月錄影《Running Man》時結緣，當時李光洙戲言話：「我哋拍?拖，下星期就會公布婚訊！」但當然又被其他人笑指只係單戀，仲叫光洙放棄！但原來李善彬都對光洙有意思，曾經喺節目《Radio Star》擔任嘉賓時，指光洙係理想對象，而且透露光洙性格好適合自己，因為自己平時唔係安靜談戀愛嘅類型，睇嚟真係曖昧成真喇！

Text：Mami Editorial

Photos：李善彬@IG