一家五口出動猶如軍隊陳豪全家到澳洲過暖笠笠聖誕

By race.cheng on 27 Dec 2018

聖誕唔一定要凍先有氣氛！陳豪今年就同老婆陳茵媺Aimee帶住3個仔女去澳洲過聖誕，Aimee喺社交網站話，今年同仔女赤腳行沙灘過聖誕，要小朋友見下著住短褲嘅聖誕老人，過一個不一樣聖誕。

47歲陳豪同陳茵媺結婚已經5年，時不時都會喺社交網站放閃，結婚無耐就已經生咗3個仔女，圈內人都笑陳豪係生仔達人，同時都擔心Aimee湊唔掂，所以今年陳豪襯住自己放假，就帶全家飛到澳洲過聖誕，話可以幫老婆分擔下。

陳豪之前接受傳媒訪問就笑話「每次出動猶如成支軍隊，上次返加拿大考起Aimee，今次去澳洲只係飛8個小時，又有我分擔吓，容易搞好多。不過通常小朋友都會覺得爹哋腍善好『點』，唔敢『點』媽咪，因為爹哋望住小朋友嘅眼神會充滿愛，很易被『攝』走，哈哈。」

Aimee成日都會同大家分享屋生活温馨相，今次全家去澳洲就特別温暖，分享張一家五口逼埋喺樓梯影嘅全家福，全家都笑得好開心，笑容仲要好似！有網民就話囡囡Camilla好似媽媽，Camilla打扮成公主，戴住皇冠首飾，但睇嚟佢忍唔到BoxingDay，好快就同哥哥一齊拆禮物，不過Aimee好細心，話已經準備咗好多聖誕禮物放咗喺聖誕樹，等小朋友可以隨時拆禮物。