鍾嘉欣仔仔化身聖誕老人可愛傻笑 姐姐優雅抱住細路

34歲嘅鍾嘉欣成家立室之後，就開始育兒大計，少咗喺幕前出現，近排佢就趁着聖誕，幫仔仔同囡囡裝扮，同大家分享仔女嘅可愛照賀聖誕。

喺加拿大過聖誕嘅嘉欣話，好耐無見大家，因為太過專注湊小朋友，少咗同大家傾計，但宜家開始穩定，可以有多啲時間同大家交流，所以先用仔女可愛照同大家Say hello。

仔仔Jared裝扮成cute版聖誕老人，面珠肥嘟嘟，仲超級開心，流露得意笑容，簡直融化晒大家嘅心。Kelly就越大越斯文，似足媽媽溫文爾雅，一邊甜笑一邊攬着細佬，但細路好似仲未識坐，成個人彎晒，跌埋一邊，但睇落似家姐唔想細路遮住自己靚樣，將細路推埋一邊，不過成個畫面都充滿愛。

鍾嘉欣同醫生老公Jeremy已經結婚3年，之後就生咗囡囡Kelly，兩年後，再接再厲，啱啱8月就生咗仔仔細仔Jared。兩個仔女一出世都遺傳爸爸最強基因，同爸爸成嗰餅印咁，希望日後可以睇到Kelly同Jared嘅成長相喇！

Text：Mami Editorial

Photos：鍾嘉欣@IG