陳柏宇老婆經歷媽媽最痛 難過無得餵人奶

35歲歌手Jason陳柏宇同33歲藝人Leanne符曉薇2017年結婚，今年9月誕下囡囡Abigail，年輕一家相處、育兒方式新穎幽默，不時係社交平台上大哂一家生活趣事。

先前Leanne係社交平台上載左張囡囡熟睡嘅相，相下寫著：「原來當知道自己唔可以餵母乳，心情會有點難受，我係一個乙型肝炎帶菌者，因為指數高所以懷孕期要食藥，但又因為餵母乳，Abi出世就要停藥，停藥之後醫生又擔心我肝指數會升，所以每個月都要驗血check 住。由於指數由上個月81已經上升到232，醫生要食返藥唔可以再餵母乳。雖然醫生同我講，而家d奶粉好好，會足夠bb嘅營養（成日聽d媽媽講飲奶粉bb好難去便便），但個刻果心都係有啲難過。以我樂觀嘅性格，難過一陣就無野，而家要開始搵岩abi嘅奶粉。」。

原來Leanne係乙型肝炎帶菌者，產後為左餵人奶一直停用藥物，最近一次覆診發現肝指數上升近兩倍多，醫生建議要服用藥物控制返，所以要停餵人奶。乙型肝炎嘅病毒存活係帶菌者嘅血液同體液入面，但凡接觸到，都有機會受到病毒感染。呢種病毒會令大量肝細胞壞死，損害肝臟功能。大部分患急性乙型肝炎嘅病人可以完全康復，但有6%病人會終身成為帶菌者，帶菌者入面嘅25%病人會轉化為慢性肝炎、肝硬化或者肝癌。

對於Leanne黎講，由囡囡早產出世開始就一直以全人奶餵哺，原意都係想比最天然、適合嘅營養比囡囡。但而家Leanne為左囡囡同自己嘅健康令佢不得不放棄餵人奶。

現時香港母乳餵哺漸漸普及，好多媽媽都想餵人奶取代餵奶粉，因為好多人都話奶粉營養少啲，又容易令BB便秘。但奈何現實總係有太多因素令不少媽媽無辦法餵人奶，Leanne就係活生生一個例子。當一個媽媽無辦法提供最好嘅嘢比自己仔女，個種自責、內疚的確係難以言喻。但其實媽媽對BB好唔好並唔係單單取決於餵人奶定奶粉，即使餵唔到人奶，亦唔等於對BB唔好，所以媽媽都唔好自責。

其實奶粉並唔係唔好，正如Leanne嘅醫生所言，奶粉一樣可以提供足夠營養比BB，大前提只係要搵一種啱BB飲嘅奶粉，同樣可以令BB健康成長、肥肥白白。

Leanne由孕期開始為保囡囡免受感染已經要不停食藥去控制，停藥後呢三個月內可以為囡囡做到全人奶其實已經好好，囡囡大個亦會好感激媽媽架，Leanne千其唔好太自責同難過啊。希望Leanne一家健健康康、快快樂樂！

Text：Mami Editorial

Sources & Photos：Leanne @ Instagram