同BB去街 途人講得最多嘅4個話題

同BB去街好容易會成為全場焦點，就算媽媽幾咁小心翼翼都好，BB瞓緊都好，都會聽到途人嘅議論。最常聽到嘅話題不外乎以下呢幾個:

1.BB係男仔定女仔

「男仔黎架？」「女仔黎架？」媽媽答得最多就係BB嘅性別，好奇怪地人人都察覺唔到BB明明著到成身粉紅色，仲戴住花花頭帶，但都會問BB係唔係男仔。對於BB係男仔嘅媽媽，比人話BB男生女相當然唔會好介意。但對於BB係女仔嘅媽媽黎講，姐係話BB成個男仔樣咁，變相話BB唔係靚女，其實媽媽聽到會傷心架。

2.年紀

除左答係男仔定女仔之外，媽媽答得多就係BB幾大個。有啲BB體型大個少少、個樣比較成熟，就好易比人話好老積。除左BB嘅年紀係話題，媽媽嘅年紀亦都係一個話題。如果媽媽係年紀比較後生或者比較老，都會比人細細聲討論。其實無話邊個年紀範圍先可以生BB架，每個女人都係咁學做媽媽。

3.BB外表

有邊個媽媽唔想自己嘅仔女皮光肉滑，奈何BB嘅外表唔係泥膠，無得話想要咩就揑出黎。BB纖瘦少少就比人話要食多啲嘢。頭髮多少都有得講，無頭髮就話要剃下先識長。其實每個BB嘅新陳代謝、吸收能力都唔同，都係由佢地順其自然比較好。

4.BB著嘅衫

媽媽買咁多衫比BB都係想BB著得靚咁去街，但好多人見到BB係冷氣地方著住件無袖衫就覺得BB要著返件外套之類。尤其上左年紀嘅老一輩覺得BB唔可以露啲關節位出黎，就算係夏天都要著長衫長褲。但其實媽媽點會唔緊張BB嘅溫飽，途人見到嘅唔一定係事情嘅全部，可能BB啱啱出左汗先除左外套。所以途人都係等媽媽主導返點樣湊BB，唔好有過度嘅干涉啊。

Text : Mami Editorial