媽媽唔好一味埋頭付出 有時偷「懶」會令屋企仲幸福

由懷孕第一日開始，媽媽就已經好唔得閒，除咗要照顧自己，仲要準備BB嘅嘢，到BB出世就要照顧小朋友，屋企嘅嘢就要再安排時間去處理，根本24小時都唔夠用，但原來偶然偷個懶，唔單只可以令自己輕鬆啲，仲可以令屋企更加幸福。

1. 「偷懶」唔好負責晒所有家中嘅事，可以令老公更加有成功感

有時候唔係老公唔想做，係老婆唔畀做。做媽媽嘅太勤力，咩都自己搞掂，久而久之，會令到老公開始習慣，甚至依賴老婆，結果佢咩都唔識做，你有時候想揾個人幫手都冇，結果24小時自己都要On Call，分分鐘自己病咗，老公都唔識幫忙處理屋企事，通常拗撬就係因為咁發生。

而且，要老公明白自己有幾辛苦，始終得把口講真係好難明。老公無實際做過，佢好難身同感受，當你抱怨嘅時候，佢就會覺得你好負面，甚至當有一日你做得唔好，就會開始指責你。

做媽媽要記住無人天生識做家務，所以要畀老公參與嘅機會，信任老公可以做好屋企嘅事，唔好因為老公無做好就指責佢，咁樣只會令老公退縮，反而做一個「懶」老婆，多啲鼓勵同表揚老公做家務，老公反而會有信心同幹勁，婚姻先會更溫馨。

2. 「偷懶」媽媽會令小朋友生活自理能力更強

有啲媽媽總係咩都幫小朋友包辦一切，就算小朋友有幾大都好，都係覺得自己從頭到尾將小朋友照顧得妥妥當當先放心。其實咁樣做只會令自己越嚟越攰，仲會令小朋友覺得「反正媽媽會幫我搞掂晒！」結果自己就親手養成一位飯來張口嘅小朋友，完全無自理能力。

所以，媽媽要學識適當時放手，令小朋友去做能力所及嘅事情。佢自己嘅衣櫃亂七八糟，就請佢自己整理，功課書包就讓小朋友自己執好。同時，唔需要因為小朋友做唔到自己所想，就心急搶返嚟自己搞掂，因為咁樣都係徒勞無功㗎！應該畀時間小朋友慢慢進步，第一次亂咁執，就提醒佢，第二次又唔成功，就再嚟，反正做「懶」媽媽嘅路好慢長，到小朋友長大佢就唔需要你幫手㗎喇！

3. 「偷懶」媽媽更有耐性 令屋企更有愛

媽媽始終都係人，人係會有脾氣，有時太多嘢做，少不免會埋怨。但如果懶媽媽就會識安排屋企唔同嘅事畀唔同嘅家庭成員負責，當每個人都會為屋企付出，媽媽就唔會成日同屋企人斤斤計較，仲會有耐性畀大家付出，所以懶媽媽會更加溫柔同有愛，唔會係咁發嬲同抱怨，對屋企有好大好處。

成功嘅「懶媽媽」唔係坐喺梳化不斷作指令，而係「身懶心不懶」，要出手時再出手，一頭家「內同外」都唔係只有一個人負責，畀機會屋企人嘗試為屋企嘅事付出，咁媽媽就會更加輕鬆，唔會覺得只有自己孤軍作戰喇！

Text：Mami Editorial

Photos：Shutterstock