【全靠親生媽媽幫自己 媽媽一眼看穿自己假冷靜】

初試牛刀同大家分享自己湊仔過程，其實都算寫畀薯蛋睇嘅日記本。

我係一位單親媽媽，關於薯蛋爸爸嘅嘢最記得就係當初同佢講我有咗，佢嘅反應係：「我仲有好多嘢未做⋯⋯」其實做女人聽到個男人咁講，就知佢想唔想負責任，當刻唔知那兒來的力量，就係咁我就轉身就走，我都唔知點算，好似預咗佢唔會負責任，所以就係咁分開咗，佢其後佢好似真係太驚做爸爸，都冇揾我，但我諗佢應該知我生咗⋯

唔知係唔係荷爾蒙影響，當時母性真係好強烈，覺得「咁點算，冇人對我負責任，感覺好差，唔通我又要對BB唔負責任？咁我同佢有咩分別？我一定要做媽媽」

身邊冇人係媽媽，根本唔可以分享，家上我又係獨生，都係單親家庭長大，完全唔知點做⋯其實表面好似好平靜，但其實我真係好驚好驚好驚好同好驚⋯

直至有日同薯蛋婆婆，即我媽媽同枱食飯，我忍唔住同媽媽講：「媽咪，我有咗」當下媽咪更係呆一呆，成間屋所有嘢都靜止咗，但可能真係生女點會唔知女心肝，媽咪出口第一句「生落嚟囉，媽咪幫你一齊湊」

我個刻真係爆喊⋯⋯⋯⋯⋯⋯⋯原來我個種假冷靜，媽媽一眼就睇得穿，佢完全冇問過我某某點睇，某某會唔會負責任⋯⋯只係即刻畀温暖我，就係咁我一直好安心，好健康，好成功生左薯蛋BB，多謝媽媽！

薯蛋BB，你記得要好好愛錫婆婆，因為佢某程度救了你一命⋯

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：薯蛋媽媽

Photos：Shutterstock

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！