BB令媽媽暖在心嘅5個舉動

BB雖然人仔細細，未識得好似大人咁待人接物、未識得諗人地嘅感受。

但佢地嘅心靈實在太純真，係相處之間都隱約感受得到佢地對人嘅好。而媽媽係BB自己揀嘅，當然係佢地嘅至愛啦，所以好多時係媽媽先會獲得BB呢幾個愛嘅舉動。以下5個舉動，簡直係可以溶化媽媽嘅心。

1.依靠係胸前

抱住BB個時，佢地要係唔中意起黎可以用好多方法反抗，可以拗腰、蹬腳、狂打，勢要你放佢落黎。但相反，當佢地需要你個時，你會感受到BB係好放鬆咁將自己靠住你個身，個下就好似得到恩寵咁，自己都會好肉緊咁攬返實BB。

2.只有媽媽抱先唔喊

好多時親戚朋友都會想同BB玩下，奈何如果BB怕生、玩得太耐都會喊住想走。當人人都搞佢唔掂，點抱、點氹都係喊，唯獨是一見到媽媽、比媽媽抱先會收聲。其他人會覺得好無趣，但媽媽就好有優越感呢！

3.小手捉住大手

望過BB手仔嘅都知真係好可愛！大人緊係想不停摸住咁得意、咁細隻嘅手啦，當調返轉BB捉住你隻手，望住佢隻手細到只可以捉實自己嘅一隻手指。望住BB捉住自己隻手黎研究，甚至拎黎咬，痛得黎個畫面又真係好有愛。

4.摸面

BB雖然未識得好好控制啲手指運動，但佢地對有興趣嘅嘢，都會用成隻手仔去掂。明明見佢力度都未掌握到，但又會識得輕輕力放隻手仔係媽媽塊面度、又識摸下媽媽塊面，就知道自己係與眾不同，諗返真係甜入心啊。

5.錫錫

唔係人人都可以有肌膚之親，教BB都係咁教，錫錫都唔係人人可以錫，就算係親戚都只可以飛吻、錫下面珠。但只有一個人，BB可以時時錫、密密錫，就係—媽媽喇！BB嘅一個錫錫已經好明確咁表現左對媽媽嘅愛喇！你話係咪好甜先？

Text：Mami Editorial