嚴寒幫BB著厚褸坐車用安全椅實測發現BB從羽絨褸飛出去

By race.cheng on 17 Dec 2018

天氣愈嚟愈凍，有時帶BB出街都會幫佢哋著羽絨，等過遲下聖誕新年BB坐車出門次數仲會愈多，著住羽絨坐車用安全椅以為無問題？其實會有致命危險。

美國《消費者報告》（Consumer Reports）雜誌同加拿大環境郵報分別發表報告指，警告唔好畀小朋友著羽絨褸坐汽車安全座椅。當中報告做咗一項碰撞實驗，將一個模擬只有1歲相似嘅假人BB，著上羽絨褸坐喺安全椅，而安全椅就放喺軌道上嘅櫈上面，模擬車上嘅座位，然後以50公里每小時嘅速度撞向牆，用嚟模擬車輛喺高速行駛下，發生碰撞嘅情況。

結果發現，撞擊時假人BB好似金蟬脫殼咁，喺羽絨褸入面飛出嚟，當初安全帶繫住嘅就剩低羽絨褸。而對比試驗發現，如果唔著羽絨褸，喺發生碰撞嘅瞬間，安全帶有效保護假人BB，假人BB並無飛出去，只係喺座椅上微微回彈。

加拿大兒童乘客安全協會主席解釋，安全帶嘅設計係將用者固定喺座位上以防止受傷，但係，當BB同汽車安全帶之間增加咗一層蓬鬆嘅褸，蓬鬆衣服會喺碰撞時受壓，令到安全帶嘅肩帶突然鬆動，BB就有受傷或彈射嘅危險。換句話指，由於我哋用安全帶將BB固定喺座位上嘅時候，固定嘅係連埋褸嘅厚度，實際無連繫BB身體，所以當遇上撞擊時，BB就會喺依條致命空隙滑出嚟。

咁冬天要著褸又應該點呢？正確做法係先除咗羽絨褸，然後繫好安全帶，然後再將羽絨褸或者棉衣衾喺身上。

或者有啲媽媽會覺得，不如我將BB抱緊啲咪安全囉，但其實當一架普通時速50公里嘅車，遇上車禍，車內嘅人都會瞬間產生約30倍於自己嘅前衝力，一位1歲左右有10公斤嘅BB就會承受相當於300公斤嘅力，就算一個超大力嘅媽媽都無理由可以抱住一個約300斤嘅「BB」喇？所以千其唔好睇少意外嘅威力，更加唔好話咩媽媽嘅本能！