同小朋友同床瞓會習慣嘅5件事

雖然健康院建議BB同大人要分床瞓，但相信有唔少媽媽都因為唔想氹完BB過床又醒，所以都會選擇同BB一齊瞓。

又或者小朋友開始大，要痴住爸爸媽媽瞓。其實到小朋友再大個啲就會覺得自己大個，唔會再願意痴住爸爸媽媽瞓。難得仔女肯同自己一齊瞓，爸爸媽媽緊係唔抗拒啦，但就要習慣以下幾件事。

1.不停幫小朋友冚被

媽媽最擔心小朋友瞓覺會冷親，但佢地又好中意負被，張被一蓋過腳仔就會不停踢不停踢不停踢，係都要踢走張被先得。搞到媽媽要不時起身檢查下、幫小朋友冚返被。

2.被拳打腳踢

小朋友入睡個時明明瞓得好直，頭係枕頭位置。但瞓到咁上下，佢地可能突然間打橫左瞓，甚至個頭瞓左去床尾個邊。就係佢地一路移動期間，媽媽就一路被佢地打。成日瞓瞓下覺就感覺到塊面、個鼻、心口等等位置好痛，有時仲會無端端比人打醒添。

3.被當人肉睡床

有時小朋友瞓得差扭計，係都要媽媽抱住先瞓得冧，媽媽就好似一張人肉睡床咁，小朋友就掛係媽媽身上面瞓；仲會有時佢地瞓到中途，自己爬上媽媽個身度瞓。

4.無位瞓

其實基本上一張加大雙人床都勉強夠加埋小朋友一齊瞓，但礙於小朋友瞓覺睡姿真係五花八門，而老公永遠都係瞓到不省人事咁，最後就逼到媽媽要去床尾瞓。

5.唔需要用鬧鐘

不論係平日定係放假，同得小朋友瞓都係唔需要用鬧鐘架，因為小朋友就係爸爸媽媽嘅鬧鐘。爸爸媽媽醒個時要細細聲唔好嘈醒小朋友，但相反呢，小朋友醒個時佢會叫醒哂爸爸媽媽。其實都幾好架，返工都唔洗驚遲到，不過放假就無得瞓到自然醒嚕。

Text: Mami Editorial