新手爸爸將囝囝放喺心口 不慎失手男嬰兩度跌親

台灣新北巿淡水有位吳姓新手爸爸，唔小心整跌自己2個月大嘅囝囝兩次，BB頭部撞擊到磁磚地面，造成顱內出血及其他多重傷害，醫生診斷是次意外會導致BB喺動作、語言、認知發展遲緩。

吳爸爸指，當時佢喺高60cm嘅床瞓覺，而囝囝就放咗喺胸口前，點知囝囝翻身，所以跌落床，當時BB頭撞到磁磚地板；而第二日，吳爸爸準備將囝囝喺BB車抱起時，又唔小心失手令BB跌落地面，由於當時BB無喊同出現異狀，所以誤以為BB無大礙，所以無送囝囝去醫院檢查。

但凌晨吳爸爸發現囝囝臉色發白、眼神呆滯，仲有發燒現象，於是即刻帶囝囝到醫院，經醫生診斷，BB頭顱內出血、硬腦膜下出血、左顴骨外側軟組織腫脹，醫院其後亦即刻報警處理。

根據鑑定，BB係35週嘅早產BB，體重當時只有3KG，報告指BB疑因為喺高處跌落，所以導致顱內出血同硬腦膜下出血，而且男嬰喺2歲嘅時候進行追蹤評估，復健後仍無法自行站立，認知能力約1歲左右。

士林地院將判吳爸爸10個月徒刑，認為雖然吳爸爸並非故意傷害，但因多次疏忽令BB重傷，屬兒童虐待，應予嚴懲。吳爸爸不服提出上訴，二審台灣高等法院將於近日開庭審理。

如果BB唔小心跌親或者撞親，其實父母要及時作適當處理，並非見「BB唔喊」就以為無事。

1.要立即檢查BB整親嘅位置

爸爸媽媽要首先檢查BB整親後意識清唔清楚，然後檢查傷口，千其唔好用力卒，因為如果受傷位置呈紅腫狀態，大力卒會令到血管唔易凝血，反而令血腫情形更嚴重！要喺24小時內冰敷，過兩日後可以轉熱敷，加速淤血代謝吸收。但如果出血，可以用乾淨毛巾壓喺傷口止血，當血流不止時，請立刻送醫。

2.72小時不斷留意BB精神狀態

有時BB整親未必會有皮外傷，又有可能外表冇咩異狀。但爸爸媽媽千其唔好以為冇事，要不斷留意BB精神狀況，例如：小BB可能會出現嗜睡、情緒躁動不安，大BB可能活動力明顯降低，又或者手腳一邊無力、兩眼瞳孔瞪大、連續嘔吐3次以上同抽筋、口齒不清、有血或不明嘅液體喺耳朵或鼻子流出，都要立即送醫。

初生BB真係需要爸爸媽媽照顧，如果唔小心整親BB一定要冷靜處理，如果BB慢慢大個學行，小小整親可能少不免，但如果有其他異像都要盡快睇醫生呀，避免一世遺憾。

Text：Mami Editorial

Sources：三立新聞網

Photos：Shutterstock