照顧BB可以培訓到媽媽唔怕污糟唔怕臭

相信大部份媽媽都想做個優雅嘅媽媽，但偉大嘅母愛會令佢地為左呢幾件事而沾沾自喜，而且好有成功感。真係好矛盾呀！

1. 清理BB鼻哥窿

見到BB鼻塞塞，抖氣都唔舒服嘅時候，媽媽總係會好心噏，搵盡辦法幫BB清理。成功清走BB嘅鼻涕同鼻屎所帶畀媽媽嘅成功感，同埋嗰份開心，應該只有媽媽先會明白。

2. 按摩肚仔幫BB去風

BB有肚風、肚仔咁唔舒服嘅時候，幫佢地溫柔咁按摩吓肚仔，會令佢地舒服好多。就算一邊幫BB按摩肚仔，佢地一邊放屁屁，媽媽都完全唔會介意，反而屁屁愈多愈開心，呢種唔怕臭嘅精神，係母愛呀。

3. 抹淨便便保護BB屁股皮膚

每次BB成功便便之後，媽媽讚完BB叻叻，喺換上新片片之前，會用濕紙巾或者濕綿花抹乾淨BB屁股，然後搽上一層花士苓。BB嘅魔力真係好大，媽媽唔嫌棄便便污糟同臭之餘，對BB屁股嘅皮膚仲好過自己嘅皮膚。

「屎、尿、屁」係媽媽觀察BB身體狀況嘅重要指標，污糟同臭都唔緊要，因為BB健康最緊要。

Text: Mami Editorial