同BB去街 最驚路人做嘅3件事

BB開始大個，媽媽唔想將BB留係屋企，驚悶親佢之餘，又想BB接觸下外界。

但係諗到BB咁細個，抵抗力又比較弱，真係要經過內心幾場掙扎先可以的起心肝帶BB去街。

作為媽媽最怕遇著路人做呢幾件事，搞到媽媽去街好似打機咁要過五關斬六將。

1.散播細菌

因為BB抵抗能力唔係好強，媽媽都好擔心BB會比人傳染到病菌。BB病左辛苦，媽媽又心痛，所以媽媽對散播細菌嘅聲好敏感架！

好多時係街度都會聽到人大聲咳同打乞嚏，或者有老人家隨地吐痰，媽媽都會帶住BB四圍走避。

如果咁岩發生係車廂入面，好彩嘅有得轉位就話轉位，但萬一無得轉位，就只可以拎紙巾掩住BB鼻仔同口咋。

2.肢體碰撞

不論係推住BB定係揹住BB，媽媽都好怕遇到有人有肢體衝突，因為發生緊衝突嘅人眼入面只有怒火，係唔會留意到附近有無老弱婦孺嘅存在。

如果咁岩條路窄少少，媽媽帶住BB真係唔知行唔行過去好，等又唔知等幾耐。

就算唔係大人之間嘅衝突，仲有年紀大啲嘅小朋友，佢地之間嘅追追逐逐，都好容易會傷到BB架。

萬一傷到BB，都唔知責唔責備佢地好⋯⋯

3.主動摸BB

由媽媽帶住BB踏出屋企門口嘅一刻，媽媽就好似帶住個宣傳品係身咁，因為行過嘅叔叔姨姨、伯伯嬸嬸、哥哥姐姐，佢地都會對你身上嘅BB好感興趣。

如果普通遠距離溝通下都無問題，但最怕係佢地主動伸手摸下BB面珠、手仔！

雖然唔係話佢地污糟，但始終媽媽唔知佢地係摸BB之前摸過咩，連做媽媽掂少少嘢都要洗手先，真係會份外擔心架。

加上係人地面前，媽媽又唔好意思即刻拎濕紙巾幫BB消毒，但BB又隨時會放手仔入口，媽媽內心真係會好糾結架！

Text: Mami Editorial