凡事總有第一次 入到產房先知道嘅3件事

由驗孕知道自己有咗BB嘅一刻起，準媽媽會經歷好多嘅第一次，如：第一次去母嬰健康院、第一次照超聲波、第一次聽到BB心跳⋯⋯每個第一次都會令媽媽感到新奇又感動。撫摸日漸變大嘅肚，準媽媽有時都會幻想自己生BB嘅畫面，好奇產房會係一個點樣嘅地方，甚至會擔心怕痛嘅自己會頂唔住。直到自己入到產房，真正經歷生BB嘅一刻，先會真正知道呢啲事。

1. 原來自己係咁忍得痛

生BB之前，自問係一個好怕痛嘅人，經常聽聞生BB係十級痛嘅事，好擔心自己揀順產會忍唔到痛而會痛死。但當經歷由陣痛到生完BB要剪會陰聯針，所有痛都一一承受得住，就會好自豪原來自己比想像中勇敢，好自豪自己咁叻！

2. 原來產房唔係咁多人會吶喊

睇得電視多，成日覺得生BB嗰陣會好多姑娘同醫生喺媽媽附近，仲會大聲叫：「加油！出力！深呼吸！見到個頭喇！恭喜你呀！係仔／女呀！」諸如此類嘅說話，實情嘅產房係冷清清，只有一個接生嘅醫生同一、兩位助產士，並無激勵人心嘅吶喊歡呼，只有醫生冷靜嘅語句同媽媽講BB嘅情況，如：臍帶纏頸等、同話畀媽媽知幾時要出力去屙BB出嚟。

3. 原來初生BB咁醜樣

日夜期盼見面嘅BB終於都出現喺自己面前，好多媽媽第一眼見到BB，都會覺得滿滿感動嘅同時又會好失望⋯⋯成身都佈滿羊水黏液同血水嘅BB眼腫面腫，媽媽都會驚訝點解自己個BB會咁醜樣㗎！然後心諗無論BB幾醜樣都好，媽媽都一樣咁愛～

Text: Mami Editorial