BB呢6個舉動 常常令到爸爸媽媽理智斷線！

湊BB常常會令到爸爸媽媽感到筋疲力竭，全因為BB每日都會有好多出其不意嘅舉動，令爸爸媽媽要花更多時間去完成湊BB嘅日程。

1. 換緊片就轉身走

同BB換片就好似玩貓捉老鼠咁，一打開塊片，只係抹咗BB屁股幾下，BB就已經冇晒耐性，想轉身走去玩其他嘢，爸爸媽媽要好狼狽咁追住BB包尿片。

2. 唔可以坐定定食完一餐

BB通常只會喺食頭幾啖嘅時候會乖乖坐定定，食到一半就開始心散想搵嘢玩，爸爸媽媽想快快餵完BB，都會滿足BB嘅要求，然後變成不斷畀玩具BB、BB不停扔落地、撿起玩具畀BB、餵BB食一啖⋯⋯無限輪迴，餵BB食一餐都要餵好耐。

3. 唔肯飲水

當BB加固後，每食完一餐都需要飲返少少水，確保BB有足夠嘅水分或沖淡口腔嘅味道。但有啲BB就係非常唔鍾意飲水，一餵飲水就會扮咳，甚至一見到水樽即耍手擰頭，轉身走咗去！當BB水分不足而出現便秘就會令爸爸媽媽非常頭痛。

4. 爸爸媽媽食飯就扭抱

一心諗住搞掂晒BB啲嘢可以好哋哋食餐飯，點知BB就唔肯放過爸爸媽媽，會不停哭喊或拉扯爸爸媽媽，要爸爸媽媽陪自己玩。

5. 專去啲唔準去嘅地方

廁所、廚房、雜物房都係BB嘅禁地，但偏偏愈唔畀BB去嘅地方，BB就愈有興趣，成日擅闖呢啲禁地，要爸爸媽媽經常捉返BB出嚟。

6. 貼緊電視機

屋企有電視機，BB都會變成超級電視迷，淨係睇都唔夠，要行埋到電視機前面，貼到實一實咁睇電視！無論爸爸媽媽拖走BB幾多次都好，BB都會行返去電視前面，為免影響BB視力，爸爸媽媽最後都唯有熄咗電視機，大家一齊唔好睇！

Text: Mami Editorial