黐身BB令媽媽無法招架 3個BB纏人招數你又遇過未？

就算媽媽幾愛BB都好，總唔能夠無時無刻都同BB形影不離，不過偏偏BB要攬住媽媽，或要媽媽坐喺隔離先會安心，一旦意識到媽媽想行開，就會使出各種招式，令媽媽行開一步都唔得。

1. 扯實媽媽嘅衣物

「媽呀，唔好走呀！」心急嘅BB會即刻緊緊扯實媽媽嘅衣物唔放，或攬住媽媽嘅大腿，直接令媽媽動彈不得！望到BB咁用力留住自己，媽媽都會感到又無奈又心疼。

2. 哭喊

當媽媽忍心將扯住衣物嘅BB手拉開，想轉身就走，BB就會立即發難，施放第二招，用喊聲引起媽媽嘅注意，希望令媽媽回心轉意，BB個喊樣就好似同媽媽講：「我咁可憐你忍心咩？」

3. 行到邊跟到邊

當發現媽媽仍然無動於衷當自己冇到，BB就會主動跟住媽媽，無論媽媽喺屋企行去邊，BB都會跟到去邊，就係唔想同媽媽離開太遠。「既然媽媽冇時間同我玩咁慘，咁我去陪下媽媽啦！」

雖然BB呢啲難纏攻擊有時會令媽媽感到好困身，唔能夠快快完成晒啲家務，不過見到BB咁努力都只係想黐實自己，媽媽都會覺得個心甜絲絲！

Text: Mami Editorial

Photo Source： Pinterest